Atentat në Gjermani ndaj futbollistit kurd

Një atentat ka ndodhur në Gjermani, ku si shënjestër ishte një futbollist me origjinë kurde, shkruajnë mediat ndërkombëtare.

Caku ka qenë Deniz Naki, i cili po shëtiste me makinën e tij në rrugët e kryeqytetit të Gjermanisë, Berlin, përcjell albinfo.ch.

Nga një makinë që i është afruar aty pranë, është hapur zjarr. Fatmirësisht, lojtari i shpëtoi plumbave. Shkak i këtij atentati, sipas të gjitha gjasave, është origjina kurde e sulmuesit të Amedspor, i cili është shprehur publikisht kundër regjimit të Rexhep Taip Erdogan, presidentit të Turqisë.

Ish-lojtari i St.Paul-it dhe Paderborn-it, që në prill të 2017-ës është dënuar nga një gjykatë turke me 18 muaj me kusht për propagandë filokurde, ka treguar momentet e frikës.

“Instiktivisht kalova në korsinë e djathtë me veturë, kur dëgjova të shtënat. Pata frikë se mos vdisja”, u shpreh ai.

Nuk është hera e parë që Naki gjendet në situatë të tilla. Në nëntor të 2014-s ai la Gençlerbirligi dhe Turqinë, duke pohuar në atë kohë se ishte viktimë e një agresioni racist në rrugët e Ankarasë për shkak të origjinës së tij dhe përndjekjes nga autoritetet turke.

Naki, tashmë 28-vjeçar, ka lindur në Gjermani dhe ka luajtur për shumë vite aty, duke luajtur në Bundesligën 2 me Alein, Sant Paulin dhe Paderbornin.