Infermierët e Kosovës do të dërgohen në Slloveni për trajnime

“Investimet në shëndetësi, përveç ndryshimeve në infrastrukturë, do të orientohen edhe në profesionalizimin e personelit tonë”, ka shkruar ministri i Shëndetësisë, Uran Ismaili

Ministri i Shëndetësisë, Uran Ismaili është takuar me ish-ministrin slloven të Shëndetësisë, Dorijan Marusiç, me të cilin kanë biseduar për mundësinë që infermierët kosovarë të trajnohen nëpër qendrat klinike të Sllovenisë. Po ashtu në këtë takim thuhet se është biseduar për mundësinë e investimeve në sektorin e Shëndetësisë.

“Investimet në shëndetësi, përveç ndryshimeve në infrastrukturë, do të orientohen edhe në profesionalizimin e personelit tonë”, ka shkruar ministri i Shëndetësisë, Uran Ismaili në Facebook.

“Ky takim, i mbështetur nga Lux Development, kishte për qëllim fuqizimin e fushës infermierike, si shtyllë kryesore e rritjes së cilësisë së shërbimeve për qytetarët tanë. Në javët dhe në muajt në vijim, do ta konkretizojmë këtë vizion me trajnime adekuate dhe vizita studimore për infermierët e Kosovës”, ka deklaruar Ismaili.