Ka fshehur mbi 1 kg. kokainë në qesen e fshesës elektrike

Shqiptari 32 vjeçar po vinte nga Amsterdami. Vlera e shitjes në rrugë e sasisë së kapur të drogës është rreth 77 mijë euro

Policia Federale e Gjermanisë ka kapur në Autostradën 3 në vendpushimin Kattenhorst një shtetas shqiptar të moshës 32 vjeçare. Ai kishte me vete më shumë se një kilogram të drogës së tipit kokainë, shkruan express.de.

I përmenduri po udhëtonte me makinën e tij “Mazda” nga Amsterdami drejt Paderbornit, transmeton albinfo.ch. Sipas policisë, ai kishte deklaruar se në Holandë kishte qëndruar vetëm tri ditë, ku kishte shkuar si turist dhe për të vizituar një kushëri.

Ajo që u ra në sy policëve ishte fakti se personi në fjalë nuk kishte fare bagazh me vete.

Me rastin e kontrollimit të mëtejmë, policët gjetën në pjesën e mbrapme të ulëses së shoferit një paketë kartoni për qesen e fshesës elektrike (pluhurthithëses). Në të ishte vendosur një sasi kokaine pre 1.12 kg. Për masat pasuese policore, i arrestuari i është dorëzuar sektorit të ndjekjes të Zyrës Doganore në Essen.

Vlera e shitjes në rrugë e sasisë së kapur të drogës është rreth 77 mijë euro.