Kurti, kandidat për kryetar të Lëvizjes Vetëvendosje

Keystone

Albin Kurti do të garojë për kryetar të Lëvizjes Vetëvendosje. Lajmin për kandidaturën e tij për postin e të parit të Lëvizjes e ka bërë të ditur me anë të një postimi në Facebook, Erzen Vraniqi, sekretar i Këshillit të Përgjithshëm të kësaj partie, përcjell albinfo.ch.

“Si anëtar i Këshillit të Përgjithshëm të Lëvizjes VETËVENDOSJE!, nënshkrova në mbështetje të kandidaturës së Albin Kurtit për kryetar të Lëvizjes. Komisioni Zgjedhor i Përgjithshëm kishte miratuar sot, pas verifikimit, deklaratën e tij të kandidimit, dhe tashmë ka nisur zyrtarisht grumbullimi i nënshkrimeve”, ka shkruar ai.

Zgjedhjet në këtë parti do të mbahen vitin e ardhshëm, derisa kryetar aktual është Visar Ymeri.

Kohët e fundit ka pasur disa pakënaqësi brenda kësaj partie, me disa anëtarë që ishin kundër Kurtit.