Haradinaj e pranon se Kosova është në krizë energjetike

Kreu i ekzekutivit ka garantuar se qytetarët e Kosovës nuk do të paguajnë për rrymën e shpenzuar në veri të vendit. Por, Haradinaj ka thënë se nuk mund të garantojë kthimin e mjeteve për qytetarët

Kryeministri i Kosovës, Ramush Haradinaj,  ka thënë se Kosova është në krizë energjetike, pasi aktualisht është duke blerë rrymë elektrike. Ai këto pohime i ka bërë pas vizitës në Korporatën Energjetike të Kosovës, ku është njoftuar nga menaxhmenti për situatën aktuale të furnizimit me energji elektrike.

“Nëpër vendbanime, nëpër fshatra të largëta, reduktimet janë më të mëdha, por përkeqësim më i madh i gjendjes nuk pritet. Kjo nuk është gjendja e duhur, por po i vuajmë pasojat e mospunës në të kaluarën”, ka theksuar Haradinaj.

Ndërsa, kur është pyetur rreth pagesës së energjisë elektrike për pjesën veriore, kreu i ekzekutivit ka garantuar se qytetarët e Kosovës nuk do të paguajnë për rrymën e shpenzuar në këtë pjesë të vendit. Por, Haradinaj ka thënë se nuk mund të garantojë kthimin e mjeteve për qytetarët.

Kurse, drejtori menaxhues i KEK-ut, Arben Gjukaj, ka thënë se Korporata Energjetike e Kosovës ka kaluar një sfidë, e cila është ndër kryesoret, ose më e madhja që pas luftës, e që është shpronësimi.