AI vlerëson kompensimin e grave të dhunuara, por thotë se drejtësi s’ka akoma

Amnesty International ka publikuar raportin e fundit për të mbijetuarit e dhunës seksuale gjate luftës në Kosovë.

“Pothuajse dy dekada pasi mijëra gra dhe vajza në Kosovë janë përdhunuar sistematikisht gjatë konfliktit të armatosur në vitet 1998-99, të mbijetuarat do të fillojnë të marrin njohje zyrtare të shumë pritur dhe dëmshpërblime. Deri tani, vetëm disa prej autorëve të krimeve janë dënuar, ndërsa të mbijetuarat vazhdojnë të luftojnë për drejtësi”, thotë Amnesty International në këtë raport, përcjell albinfo.ch.

Raporti i titulluar “Plagë që të djegin shpirtin”: kompensim për të mbijetuarit e përdhunimeve gjatë luftës, por drejtësi s’ka akoma, nxjerrë në pah pasojat shkatërruese fizike dhe psikologjike të dhunës seksuale që kanë përjetuar të mbijetuarat, të cilat, deri tani, janë margjinalizuar nga shoqëria dhe nuk kanë marrë asnjë mbështetje nga qeveria.

“Të mbijetuarit e dhunës së llahtarshme seksuale janë zhgënjyer për vite me radhë nga komuniteti ndërkombëtar dhe qeveritë e njëpasnjëshme. Fajtorët i kanë shpëtuar drejtësisë, ndërsa të mbijetuarat janë margjinalizuar, harruar dhe ju është mohuar drejtësia. Kjo ka filluar të ndryshojë, por mbetet akoma shumë për të bërë”, deklaroi Gauri van Gulik, zëvendësdrejtoreshë e Amnesty International për Evropën.

Nga janari i 2018-ës, ato do kenë të drejtë të marrin një shpërblim mujor prej 230 euro si dëshmshpërblim për pasojat fizike, psikologjike, ekonomike dhe sociale që dhuna seksuale ju ka shkaktuar.

“Shpërblimi që iu mundësohet së shpejti është financiarisht dhe simbolikisht i rëndësishëm, por për shumë prej tyre do të jetë shumë pak, dhe shumë vonë”, tha Gauri van Gulik.