Kryetar në tri mandate, pa parti dhe pa fushatë

Refki Suma është kryetar i Hanit të Elezit, në tri mandate radhazi. Ai është i pavarur, derisa nuk ka zhvilluar fushatë, pasi ka thënë se puna e tij flet vetë. Dhe kjo ju shpërblye, duke e zgjedhur sërish në krye të kësaj komune.

Por, si e ka arritur këtë? Duke folur për “Radion Evropa e Lirë”, ai thotë se e ka bërë të kundërtën që, sipas tij, e kanë bërë kandidatët për kryetarë të komunave të tjera të Kosovës. Ai nuk ka dhënë asnjë premtim.

“Qytetarët e Hanit të Elezit e kanë parë që ne, në asnjë mandat, asnjë premtim nuk e kemi bërë. Por, në fakt, jemi mundur që t’i realizojmë të gjitha ato kërkesa që kanë qenë të qytetarëve dhe që kemi pasur mundësi t’i realizojmë. Pra, do të thotë, nuk ka nevojë. Qytetari dëshiron të ketë një kandidat, një kryetar që nuk premton, por që realizon”, thotë ai, përcjell albinfo.ch.

Hani i Elezit i ka të gjitha rrugët e asfaltuara dhe rrugicat me kubëza, jo vetëm në zonën urbane, por edhe në të gjitha lagjet e fshatrave të kësaj komune. Secila rrugë ka ndriçimin publik.

Sektori i arsimit në këtë komunë, paraqitet në gjendje mjaft të mirë, me shkollat që kanë inventarë të ri, me kushte të mira për nxënësit dhe ku secila dhomë e mësimit ka projektorin e saj. Gjithashtu, për secilin mësimdhënës në komunën e Hanit të Elezit, komuna ka siguruar lap-top personal.

Kryetari i komunës së Hanit të Elezit, Suma, thekson se problem niveli i ndotjes së ambientit, i cili në këtë komunë ka qenë i lartë për shkak të fabrikës së çimentos, tashmë ka rënë ndjeshëm. Megjithatë, sipas tij, mbeten probleme: sigurimi i ujit, si dhe punësimi, për zgjidhjen e të cilave, siç thotë ai, komuna është e pafuqishme.

Qytetarët janë shprehur të kënaqur me punën e tij dhe për këtë arsye, i kanë dhënë votën.

Hani i Elezit ka rreth 10 mijë banorë dhe është komuna më e skajshme jugore e Kosovës.