Bulliqi nuk komenton për reagimin e ambasadorit amerikan

Kryetari i Komisionit të ri Shtetëror për shënjimin e demarkacionit me Malin e Zi, Shpejtim Bulliqi, nuk ka komentuar deklaratën e ambasadorit amerikan Greg Delawie, i cili raportin e këtij komisioni e quajti “broçkull”.

“Unë nuk kisha dashur të komentoj asgjë, Amerika është miku më i mirë i Kosovës, ata na kanë ndihmuar, jam i bindur që na duan të mirën dhe besoj shumë që edhe ne si Komision jemi të interesuar që këtë çështje ta shtyjmë përpara, sepse na pret një punë më e madhe, demarkacioni me Serbinë”, ka thënë Bulliqi në emisionin “Interaktiv” të KTV-së, transmeton albinfo.ch.

Ai ka folur edhe për akuzat se Komisioni ka shpenzuar mbi 50 mijë euro gjatë punës për demarkacionin me Malin e Zi, duke i mohuar ato.