Lirohen nga burgu të dënuarit për vrasjen e pesë maqedonasve

Vendimi i gjykatës së lartë pason vendimin e datës 3 tetor për rigjykimin e këtij rasti, që për rreth pesë vjet ka shkaktuar protesta e reagime të shumta në opinion

Gjykata Supreme e Maqedonisë ka vendosur që t’i lirojë nga burgu të dënuarit me burgim të përjetshëm për vrasjen e pesë maqedonasve, në prill të vitit 2012, pranë një liqeni artificial në Smillkovcë. Rasti është i njohur në opinion si “Monstra”, shkruan “Radio Evropa e Lirë”.

Vendimi i gjykatës së lartë pason vendimin e datës 3 tetor për rigjykimin e këtij rasti, që për rreth pesë vjet ka shkaktuar protesta e reagime të shumta në opinion.

Të njëjtit do të mbrohen në liri me obligimin që dy herë në javë të paraqiten në Gjykatën Penale Shkupi 1.

Lirimi nga burgu i Agim Ismailoviqit, Fejzi Azirit, Haki Azirit dhe Sami Lutës vjen me kërkesë të prokurorisë për rigjykimin e rastit, për shkak të paraqitjes së dëshmive të reja që këta persona mund t’i lirojnë nga akuza për vrasjen e maqedonasve, përcjell albinfo.ch.

Dy të akuzuar të tjerë për këtë vepër, Alil Demiri dhe Afrim Ismailoviq, ndodhen në arrati.

“Është një fitore e të gjithë atyre që janë angazhuar për të ardhur deri te ky moment. Është hapi i parë që u bë drejt zbardhjes së rastit dhe shpresojmë se do të përfundojë ky ankth dhe e vërteta do të dalë në sipërfaqe, si për familjet tona, ashtu edhe për familjarët e viktimave, pasi edhe ata duan drejtësi apo të dinë autorët e vërtetë të vrasjes së djemve të tyre”, ka deklaruar Bedri Ajdari nga këshilli i familjarëve të dënuar.