Kreu i Akademisë së Shkencave ia paraqet dorëheqjen presidentit Meta

Zyra për mediat e presidentit bën të ditur se ishte akademiku Beqiraj, i cili shprehu vullnetin e tij për t'u dorëhequr, duke theksuar se ai do të mbetet përkrah kolegëve të tij akademikë

Kryetari i Akademisë së Shkencave të Shqipërisë, akademiku Gudar Beqiraj ka paraqitur dorëheqjen nga detyra e tij vetëm dy muaj pasi është zgjedhur. Ai për vendimin e marrë zyrtarisht e ka njoftuar edhe presidentin e Shqipërisë, Ilir Meta në një takim që ka pasur me të.

Në njoftimin e presidencës thuhet se në takimin e zhvilluar u diskutua për situatën aktuale të Akademisë së Shkencave, procesin e reformimit të saj dhe sfidat dhe perspektivën e përballjes së tyre me sukses, përcjell albinfo.ch.

Zyra për mediat e presidentit bën të ditur se ishte akademiku Beqiraj, i cili shprehu vullnetin e tij për t’u dorëhequr, duke theksuar se ai do të mbetet përkrah kolegëve të tij akademikë, mbështetës dhe kontribuues i procesit të reformimit të nisur tashmë të këtij institucioni të rëndësishëm.

Vendimi është pranuar nga presidenti, i cili ka vlerësuar figurën dhe kontributin e akademikut Beqiraj.