Asociacioni i Gazetarëve: Të mos pengohen gazetarët gjatë zgjedhjeve

AGK kërkon nga të gjithë drejtuesit e qendrave të votimit që të mos pengojnë gazetarët në kryerjen e punë së tyre si dhe të respektojnë ligjet në fuqi

Asociacioni i Gazetarëve të Kosovës ka kërkuar nga institucionet dhe partitë politike në Kosovë që mos t’i pengojnë gazetarët në punën e tyre gjatë procesit të zgjedhjeve. Reagimi i AGK-së vjen pasi ekipi i televizionit 21 është penguar në Obiliq për të marrë informacione rreth ecusirës së procesit të votimit.

Informatën për AGK-në e ka bërë të ditur gazetarja Fitore Ademi e cila ka thënë se ekipi I televizionit nuk është lejuar që të futet brenda ambienteve të qendrës së votimit.

“Në qendrën më të madhe të votimit në shkollën “Ibrahim Rugova” në Obiliq, ekipi i RTV21 u pengua që të përcjell procesin zgjedhor. Ne nuk e dimë nëse drejtuesit e kësaj qendre kanë ndjekur trajnimet e KQZ-së apo kanë dashur të fshehin diçka nga syri i kamerës sonë, por, kërkesa jonë për autoritetet përgjegjëse është që ta hetojnë këtë rast”, ka thënë gazetarja Ademi.

Duke ju referuar këtij rasti, AGK dënon veprimin e menaxherit, kryesuesit të kësaj qendre të votimit si dhe fjalorin përdorur ndaj kolegëve Fitore Ademi si dhe kameramanit Sahit Kokolli.

“AGK kërkon nga të gjithë drejtuesit e qendrave të votimit që të mos pengojnë gazetarët në kryerjen e punë së tyre si dhe të respektojnë ligjet në fuqi. Po ashtu AGK, kërkon nga kolegët që të raportojnë çdo pengesë që ju bëhet në punën e tyre në Asociacionin e Gazetarëve të Kosovës si dhe në Policinë e Prokurori që janë të angazhuara në mbarëvajtjen e procesit të votimit”, thuhet në reagim.