Për 7 muaj, në Kosovë nga diaspora janë dërguar 420 milionë euro

gjatë 7 muajve të parë të këtij viti në formë të remitancave në Kosovë kanë hyrë 420 milionë euro. Në raport me periudhën e njëjtë të vitit paraprak, shtimi është 40 milionë euro

Paratë nga diaspora vazhdojnë të jenë burimi mbase kryesor i të ardhurave në Kosovë. Se nuk ka rënie të këtij trendi, përkundrazi ka një rritje, tregojnë të dhënat më të reja të Bankës Qendrore të Kosovës.  Sipas saj, gjatë 7 muajve të parë të këtij viti në formë të remitancave në Kosovë kanë hyrë 420 milionë euro. Në raport me periudhën e njëjtë të vitit paraprak, shtimi është 40 milionë euro. 

Më tutje BQK tregon se gjatë muajit korrik në formë të remitancave në vendin tonë kanë ardhur 60 milionë euro dhe nga kjo shumë 13.6 milionë euro kanë ardhur përmes bankave komerciale, 24.6 milionë euro përmes agjencive për transferim të parave, si dhe 21.72 milionë euro përmes rrugëve të tjera, shkruan sot Gazeta “Zëri”.

Gjatë muajit qershor sipas të dhënave të BQK-së, në vendin tonë në formë të dërgesave kanë ardhur 71.1 milionë euro dhe nga kjo shumë 10.1 milionë euro janë dërgesa përmes bankave, 35.2 milionë euro janë transferime përmes agjencive, si dhe 25.7 milionë euro janë mjete që kanë ardhur përmes rrugëve të tjera.

Gjatë muajit maj në Kosovë kanë ardhur në formë të remitancave 67.6 milionë euro, në muajin prill kanë ardhur 57.9 milionë euro, në muajin mars kanë ardhur 64.7 milionë euro, gjatë muajit shkurt kanë ardhur 50.7 milionë euro, si dhe gjatë muajit janar në Kosovë në formë të dërgesave kanë ardhur 48 milionë euro.