Hapet një paralele e gjuhës shqipe në Holzkirchen të Gjermanisë

Në Holzkirchen të Gjermanisë, Këshilli për Mësimin Plotësues në Gjuhën Shqipe në Bavari, së bashku me këshillin e prindërve të këtij qyteti dhe në praninë e telave të çiftelisë dhe të gitares bënë hapjen e klasës në gjuhën shqipe.

Të pranishëm ishin prindërit e nxënësve dhe kryetari i KMPGJSH-së, Mustafë Krasniqi.
Krasniqi ndër të tjera theksoi rëndësinë e mësimit shqip dhe sfidat e mëdha në këtë rrugëtim që do të sfidohen mësimdhënësit në bashkëpunim me këshillat e prindërve dhe Këshillin për Mësimin Plotësues në Gjuhën Shqipe në Bavari.

Të pranishmëve iu drejtua edhe koordinatori i Këshillit të prindërve të këtij qyteti, Hakif Qerimi, ku ndër të tjera tha: “Ishte një privilegj për mua dhe tërë Këshillin, ka mbi një vit që në bashkëpunim me Krasniqin bëjmë përpjekje të hapim shkollat dhe sot u arrit ky qëllim, ku jam tepër i lumtur që po e fillojmë mësimin me 26 nxënës, e shpresojë që së shpejti të kemi dyfishin e këtij numri të nxënësve”.

Pas fjalës së koordinatorit Hakif Qerimi, mësuesja Blerina Vali iu drejtua nxënësve dhe prindërve me një gjuhë të ëmbël e të afërt për nxënës dhe prindër, foli për mënyrën e mësimit dhe rëndësinë e gjuhës, si dhe premtoi se me një bashkëpunim mësues, nxënës dhe prind do të kemi sukses, mbase dhe shkëndijat e rrezes së diellit do t’i ndiejmë atëherë kurë fëmijët tanë nuk belbëzojnë në gjuhën shqipe.

Në fund u dhanë dy pika muzikore të akorduara nga nxënësit e posafilluar, që në hapat e parë u pa serioziteti dhe dëshira që zëri i shqipes të kumbojë aty ku ka shqiptarë. Tërë kësaj madhështie ia shtoi vlerën shqiponja jonë dy krenare dhe kënga “Jem Ilira”, të kënduar nga nxënësit, e përcjellë nga prindërit.

Nxënësve kryetari Krasniqi iu ofroi librat, që ditë më parë i kishte marrë nga Konsullata e Republikës së Kosovës, që dhe vlerësoi lart përpjekjet e dy konsullatave tona shqiptare, të Shqipërisë dhe Kosovës, përfaqësuesit e të cilave janë të pranishëm në çdo takim të KMPGJSH-së. Gjë që ky bashkëpunim i KMPGJSH-së me Konsullata i inkurajoi më tepër prindërit dhe me duartrokitje përshëndetën këtë kontribut të tyre që u përcoll deri te prindërit përmes Krasniqit.
Në fund morën një foto të përbashkët dhe uruan që të ketë kjo nismë suksese të mëtutjeshme dhe rrugë të mbarë!

Fatmire Krasniqi