Ikin nga Kosova, punësohen në Gjermani

Ata thonë se largohen për shkak të kushteve jo të mira në Kosovë, apo edhe për të ardhme më të mirë

Shumë qytetarë të Kosovës vazhdojnë të kryejnë kurse të ndryshme për t’u punësuar në shtetet perëndimore, përkatësisht në Gjermani.

Një grup i të rinjve e të rejave po i marrin kontratat e punës dhe ata brenda pak kohësh do të nisin jetën dhe aktivitetin e tyre në Gjermani. Ata thonë të jenë të dëshpëruar tej mase me mosgjetjen e një vendi të punës në Kosovë, andaj kanë vendosur që përfundimisht t’u japin fund përpjekjeve dhe të ikin jashtë vendit, raporton “KTV”.

Kjo vlen edhe për pediatren, Flora Abazi-Krasniqi, e cila ka vendosur që të largohet nga Kosova për shkak të gjendjes së rëndë, dhe kushteve të vështira në Kosovë. Arsyeja tjetër është që të ketë të ardhme më të mirë për fëmijët e saj, përcjell albinfo.ch.

Burbe Qenaj kishte konkurruar disa herë në institucionet shëndetësore, por asnjëherë nuk iu ofrua një mundësi e tillë. Edhe disa tjerë thonë të jenë të pakënaqur me kushtet e punës në Kosovë.

Në këtë institucion arsimor po përgatitet edhe ky grup për t’u punësuar në njërën nga institucionet shëndetësore gjermane. Drejtuesit e saj thonë se numri i të interesuarve është shumë i madh dhe për shkak të saj, kanë nisur edhe trajnimet e stafeve të një numër fushash të tjera.