Gala mbrëmje në Nju Jork me Lorik Canën dhe kongresmenin Eliot Engel

Kjo mbrëmje do të organizohet nga fondi Kosovaro-Amerikan për Edukim (KAEF) dhe mbrëmja e titulluar “Kosova on the World Stage” do t’i vë në pah të arriturat e programit KAEF dhe ato të Kosovës në skenën ndërkombëtare

Më 25 maj në Nju Jork të Shteteve të Bashkuara të Amerikës do të mbahet një Gala mbrëmje për Kosovën, ku në mesin e të ftuarve do të jenë Lorik Cana dhe kongresmeni Eliot Engel, raporton albinfo.ch.

Kjo mbrëmje do të organizohet nga fondi Kosovaro-Amerikan për Edukim (KAEF) dhe mbrëmja e titulluar “Kosova on the World Stage” do t’i vë në pah të arriturat e programit KAEF dhe ato të Kosovës në skenën ndërkombëtare.

Qëllimi i kësaj mbrëmjeje është të shikohen të arritur e Kosovës në fusha të ndryshme. Studentët e KAEF-it dhe mysafirët e ngjarjes janë ata të cilët po e përforcojnë në vazhdimësi imazhin e Kosovës në skenën ndërkombëtare.

I themeluar në vitin 2004, programi i KAEF-it, ka ofruar rreth 90 bursa të nivelit master për studentët nga Kosova.

“Programi KAEF ka nderin që të ketë mbështetjen e yllit të futbollit, Lorik Cana dhe të kongresmenit amerikan, Eliot Engel, të cilët si mysafirë të veçantë do të mbajnë fjalimet kryesore në këtë ngjarje”, thuhet në njoftim.

Në këtë ngjarje, KAEF-i do të prezantojë çmimin vjetor të dytë me radhë “David Gotaas Community Supporter Award”.