Argëtimi i fëmijëve në kampin e Shaqirit

“Natyrisht ai është shumë i zënë me takime dhe nuk mund të ndalet në çdo kamp, megjithatë për këtë arsye kemi krijuar ‘Shaq-Day” apo “Dita e Shaqirit” për ta takuar yllin e futbollit. Kjo do të bëhet në Rapperswil më 25 qershor. Atje të gjithë pjesëmarrësit do të kenë mundësi për të takuar Xherdanin”, ka thënë Arianit Shaqiri

albinfo.ch

Nëse dëshironi të takoheni me yllin e futbollit Xherdan Shaqiri, atëherë ju keni një mundësi nëse jeni pjesë e kampit të Shaqirit. Themeluesi i kampeve, Arianit Shaqiri në një intervistë për “regional-fussball.ch”, tregon gjithçka rreth kampeve me fëmijët, përcjell albinfo.ch.

Ai në fillim tregon për idenë e mbajtjes së kampeve. “Kjo ka ndodhur kur e kam shoqëruar vëllain tim Xherdanin gjatë kohës së tij në Bayern Munich dhe kemi biseduar shumë për futbollin. Një mbrëmje ishim së bashku në shtëpi dhe më tha të ndërtojmë një akademi profesionale të futbollit dhe të mbajmë kampe për fëmijët”, tregon Arianiti në fillim.

Në kampe fëmijët mund të argëtohen dhe të luajnë futboll. “Koncepti unë është në kampe të mos ketë më shumë se 80 fëmijë, pasi dëshirojmë cilësi dhe fëmijët të jenë të lumtur. Për ne është shumë e rëndësishme disiplina që mbretëron. Kampet tona gjithashtu janë një shkollë e jetës”, ka shtuar tutje ai.

Fëmijët mund të takojnë Shaqirin. “Ai ka qenë në Wallisellen tetorin e kaluar në një vizitë një-ditore. Natyrisht ai është shumë i zënë me takime dhe nuk mund të ndalet në çdo kamp, megjithatë për këtë arsye kemi krijuar ‘Shaq-Day” apo “Dita e Shaqirit” për ta takuar yllin e futbollit. Kjo do të bëhet në Rapperswil më 25 qershor. Atje të gjithë pjesëmarrësit do të kenë mundësi për të takuar Xherdanin. Pra, do të jetë një befasi e bukur”, ka theksuar Arianiti.

Ai më tutje ka treguar edhe për aktivitet që mbahen. Fëmijët janë nga mosha 6-16 vjeçare. Kampet janë gjithashtu edhe për vajzat. Kampi kushton 350 franga, kurse për çdo vëlla do të ketë zbritje në 270.