Nga Zvicra te Flamurtari i Vlorës

Haxhi Neziraj vjen nga Zvicra për të përforcuar Flamurtarin e Vlorës, derisa i është bashkuar skuadrës në stërvitje

Skuadrat e Superligës shqiptare po vazhdojnë përgatitjet për stinorin pranveror e gjithashtu po përforcohen për pjesën më të rëndësishme të sezonit.

Mësohet se Flamurtari i Vlorës ka arritur marrëveshje me 23-vjeçarin, Haxhi Neziraj. Ai vjen nga Zvicra, derisa kohët e fundit ishte pa ekip, edhe për shkak të një lëndimi, përcjell albinfo.ch.

Neziraj është një lojtar i afirmuar i Superligës zvicerane, teksa ka qenë për disa vite pjesë e Luzernit, pikërisht shok ekipi me mesfushorin e Kombëtares shqiptare, Jahmir Hyka.

Ai është 23 vjeç dhe karrierën e ka nisur te Luzern në vitin 2012. Pasi bëri mirë në ekipet e grupmoshave, mesfushori debutoi në Superligën zvicerane në sezonin 2012-2013, ku në vetëm dy ndeshje të luajtura arriti të shënonte edhe një gol. Neziraj është një ish-lojtar i Kombëtares shqiptare U-21, ku është aktivizuar në 5 takime.

Pasi nuk gjeti shumë hapësira te Luzerni, Neziraj u huazua në vitin 2014 tek ekipi i Ligës së Dytë helvete, Wohlen, duke bërë një sezon fantastik. Së fundmi, ai është aktivizuar me Schaffhausenin, por që prej majit 2016 rezulton të jetë jashtë fushave prej një dëmtimi që pësoi.