Një parukë, si mbështetje morale për gratë e Kosovës, të prekura nga kanceri

Poetja dhe veprimtarja e dalluar Nerxhivane Ferati-Sejdiu, ka filluar këto ditë në Gjenevë të Zvicrës, aksionin “Një paruke si mbështetje morale për gratë e Kosovës,të prekura me kancerin e gjirit”

Organizata Botërore e Shëndetësisë me seli në Gjenevë të Zvicrës, muajin që shkoi e ka shpallur si aksion ndërkombëtar të luftës kudër kancerit të gjirit.

Duke parë rritjen e prekshmërisë nga kjo sëmundje kjo organizatë ka apeluar tek të gjitha vendet e botës  zbatimin e masave shtesë, në mënyrë që me diagnostikim sa më të hershëm të pengohet zhvillimi i akceseve të reja të kësaj sëmundjeje.

Kësaj thirrje i janë përgjigjur edhe institucione e organizata shëndetësore të Republikës së Kosovës.

Ato nëpërmjet ekspertëve të fushës së onkologjisë në nëntë komuna të vendit,kanë mbajtur ligjërata,duke dhënë këshilla dhe sugjerime mbi preventivat që duhet ndërmarrë çdo femër sidomos ato të grup-moshave  dyzetepesë – pesëdhjetë vjeçe .

Gjatë kësaj fushate të gjerë ndërgjegjësimi pranë njësiteve të mamografisë janë bërë rreth 2050 vizita falas me qëllim të parandalimit të kësaj sëmundje shqetësuese e cila në gjithë botën konsiderohet si vrasësi kryesor i femrave.

Sipas statistikave që posedon Instituti Onkologjik i Kosovës dhe Organizata Joqeveritare “Jeta-Vita” në Kosovë, më 2015 me kancer janë identifikuar 920 veta.

Nga ky numër 210 veta janë diagnostikuar me kancer të gjirit. Ndërkaq në nëntëmujorin e parë të vitit të sivjetmë  janë shënuar edhe 250 raste të reja.

Duke parë gjendjen alarmuese dhe koston tepër të lartë për trajtimin e kësaj sëmundje si dhe mundësitë e kufizuara për terapinë bazë të nënave dhe motrave tona, poetja dhe veprimtarja e dalluar Nerxhivane Ferati-Sejdiu, ka filluar këto ditë në Gjenevë të Zvicrës,  aksionin “Një paruke si mbështetje morale për gratë e Kosovës,të prekura me kancerin e gjirit”

Zonja Ferati-Sejdiu thotë: “ ideja për këtë projekt më ka lindur para dy tre-muajve, ngase gjatë verës derisa isha me pushime në vendlindje  pashë  gra tullace si pasojë e kimioterapisë dhe gjendja e tyre më rëndojë tepër emocionalisht”.

Andaj me padurim  prisja  rastin që të filloj me  këtë aksion të domosdoshëm.  Shpresoj se do të kemi edhe përkrahjen e njerëzve e sidomos të grave dhe vajzave bamirëse të Gjenevës.

Pastaj në kontakt me zonjën Nafije Latifi , udhëheqëse e Qendrës Joqeveritare “Jeta-Vita” në Kosovë,këto paruke do të shpërndahen tek gratë në nevojë.

Të gjithë jemi të vetëdijshëm që kjo ndihmë është simbolike sepse kjo sëmundje me fatalitet kërkon kujdes të përpiktë, kuadro të specializuara , aparaturë moderne, dhe terapi të shtrenjtë.

Mirëpo  çfarëdo përkrahje qoftë në këtë rast  është veprim emancipues i shoqërisë sonë.

Zonja Ferati-Sejdiu,thërret  të gjitha gratë dhe vajzat e Kosovës integriteti i të cilave është vënë në provë në asnjë çast mos ta ndjejnë  veten të braktisura, sepse pranë tyre me ngrohtësinë më të madhe do të qëndrojmë ne motrat  e tyre mërgimtare.

Ata të cilët duan të kontribuojnë në këtë aksion mund të  kontaktojnë drejtpërdrejtë me nismëtaren e kësaj iniciative  zonjën Nerxhivane Ferati-Sejdiu , në numër celulari :  0763471328 ose nëpërmjet adresës elektronike: [email protected]