Shënojnë Berishët

Besart Berisha ka shënuar 82 gola deri më tani në futbollin australian dhe është në ndjekje të rekordit të të gjitha kohërave në Australi

Dy futbollistë kosovarë, Besart Berisha dhe Bernard Berisha kanë shënuar për skuadrat e tyre respektive, shkruan albuinfo.ch.

Besarti ka shënuar për skuadrën e tij, Melboune Victory. Berisha, në minutën e 20-të, ka shënuar golin e parë në fitoren 1:2 të skuadrës së tij Adelaide United.

Me këtë gol sulmuesi kosovar, i cili ka luajtur më parë edhe për kombëtaren shqiptare, është afruar edhe më shumë drejt rekordit të golashënuesit më të mirë të të gjitha kohërave në Australi. Ai tani numëron 82 gola duke qëndruar në vend të tretë, ndërkohë dy rekordmenët mbi të kanë shënuar 89 dhe 90 gola.

Gol realizoi edhe Bernard Berisha. Në ndeshjen e zhvilluar në udhëtim tek Tomsk, Berisha ka shënuar golin e tretë në fitoren 3:0 të Anzhit. Ky ishte goli i tretë në Rusi për këmbëshpejtin kosovar.