Spanjollët, frikë nga kuqezinjtë

Futbollistët spanjollë kanë thënë se nuk do të kenë aspak lehtë ndaj Kombëtares shqiptare. Kështu u shprehën Nacho, Vitolo e Morata

Barazimi me Italinë është hedhur pas krahëve nga Spanja që tashmë është fokusuar maksimalisht te përballja kundër Shqipërisë të dielën në “Loro Boriçi”, shkruan albinfo.ch.

Në prononcimin e tyre për faqen zyrtare të Federatës spanjolle, mbrojtësi Nacho dhe sulmuesi Vitolo flasin për pritshmëritë që kanë nga sfida e Shkodrës.

Futbollisti madrilen paralajmëron shokët e skuadrës, duke theksuar se Shqipëria nuk ka emra të mëdhenj si Italia, por do të jetë një kundërshtar shumë i vështirë. “Ata kanë një stil loje të rrezikshëm dhe mendoj se janë një skuadër e rrezikshme edhe pse nuk kanë në përbërje emra të mëdhenj. Gjithsesi ne do të kërkojmë me çdo kusht fitoren”, shprehet Nacho.

Në të njëjtën linjë qëndron edhe sulmuesi i Sevillas, Vitolo. “E dimë shumë mirë se Shqipëria, ndryshe nga Italia nuk është një skuadër shumë e njohur por duhet të jemi shumë të kujdesshëm sepse do të na i vështirësojë shumë punën. Është një kundërshtar i vështirë dhe ne duhet të jemi edhe më të motivuar se në ndeshjen me Italinë”, ka thënë Vitolo.

Dëmtimi i mbrojtësit Jordi Alba ka vënë në alarm kombëtaren spanjolle. Trajneri Julen Lopetegui vendosi të grumbullojë Nacho Monrealin. Do të jetë mbrojtësi i Arsenalit ai që do të marrë përsipër të luajë në vendin e Albas në krahun e majtë të mbrojtjes në përballjen me kombëtaren shqiptare.

Në sfidën ndaj Shqipërisë në “Loro Boriçi”, Spanja e sheh kreun e Grupit G dy pikë larg edhe pse jemi vetëm në startin e kualifikueseve. Por një hap fals ndaj kuqezinjve mund të kushtojë shumë, e për këtë, trajneri Lopetegui po mendon një lojtar më të kontrollueshëm si Morata. “Mendoj se do të jetë shumë e vështirë, sepse fusha e tyre është e tillë. Kam luajtur atje më parë me U-21 dhe ishte një ndeshje për t’u harruar dhe shumë e vështirë për t’u fituar. Por ne do të shkojmë në Shqipëri për të dhënë gjithçka”, ka thënë Morata.