Interi pas Januzajt

Skuadra e madhe italiane, Inter është gati për të bërë një ofertë drejt futbollistit shqiptar, i cili nuk po ka hapësira në Manchester United

Mesfushori 21 vjeçar, Adnan Januzaj nuk do të ketë hapësira edhe këtë sezon që po vjen nën urdhrat e Jose Mourinhos pas mbërritjes së Henrik Mkhitaryan nga Borussia Dortmund, shkruan albinfo.ch.

Januzaj nuk është më një prej lojtarëve që konsiderohet si pjesë e formacionit te United, madje edhe vitin e kaluar ai u huazua te Borussia Dortmund përpara se të rikthehej sërish te rezervat e klubit nga Manchester. Lojtari i përfaqësueses belge bëri shtatë paraqitje me U21 sezonin e kaluar.

Por, siç raportojnë mediat italiane, Inter mund t’i ofronte një zgjidhje Januzajt. Inter ka gati një ofertë për Januzaj pas vështirësive që po kalon me transferimet e Joao Mario dhe Antonio Candreva.

Klubi italian është gati ta huazojë lojtarin me origjinë shqiptare me të drejtë blerje vitin tjetër prej tetë milionë euro. Kontrata e Januzajt me United skadon në vitin 2018. Deri tani ai ka bërë 50 paraqitje duke shënuar pesë gola me United.

Ndërkohë, Januzaj ende nuk e ka bërë të qartë nëse do të vjen të luajë për Kosovën, pasi te Belgjika nuk po ka hapësirë.