Gjermania në gjysmëfinale, rasti për Mustafin

Shkodran Mustafi më 2014 fitoi Kupën e Botës me Gjermaninë, duke u bërë futbollisti i parë shqiptar që arrin një sukses të tillë

Shqipëria u eliminua nga Kampionati Evropian në fazën e grupeve, derisa në 1/8 e finaleve u eliminua edhe Zvicra ku paraqiten gjashtë futbollistë shqiptarë. I vetmi në garë ka mbetur Shkodran Mustafi, i cili me Gjermaninë u kualifikua në gjysmëfinale, shkruan albinfo.ch.

Mustafi është paraqitur vetëm në ndeshjen e parë ndaj Ukrainës, dhe arriti të shënojë gol, por me kthimin e Mats Hummels, ai u ul në bankën rezervë. Megjithatë, futbollisti i ri i Bayernit, u ndëshkua me karton të verdhë dhe do të mungojë në gjysmëfinale.

Ky është një rast i mirë që trajneri Joachim Low t’i besojë futbollistit shqiptar, i cili po kërkohet nga shumë skuadra evropiane. Mustafi më 2014 fitoi Kupën e Botës me Gjermaninë, duke u bërë futbollisti i parë shqiptar që arrin një sukses të tillë.