Program i pasur i ansamblit “Gëzuar” dhe mirënjohje për mikun e shqiptarëve, Leuenberger

Në shumëllojshmërinë tematike të minifestivalit “Te recuerdo” në Gjenevë, edhe Ansambli i Këngëve dhe Valleve “Gëzuar” nga Gjeneva

Departamenti i  Rinisë, Sportit dhe Kulturës  në dyzet e pesë komunat e Kantonit të Gjenevës, çdo fillim muaji nëpërmjet portaleve dhe revistave informative  publikon Kalendarin e ngjarjeve sportive dhe kulturore. Pjesë e këtyre zhvillimeve të rëndësishme janë edhe komunitetet e ndryshme të huaja që jetojnë dhe veprojnë në Gjenevë.

Falë vullnetit dhe përkrahjes së miqve në këtë drejtim arritje të dukshme ka shënuar edhe komuniteti shqiptar. Ai, i organizuar në klube, shoqata e asociacione të ndryshme kohëve të fundit është bërë faktor i rëndësishëm i shoqërisë gjeneviane.

Integrimin tonë të gjithëmbarshëm padyshim e kanë  ndihmuar  edhe miqtë tanë zviceranë  e në veçanti Ueli  Leuenberger. Ai, për dyzet vjet të plota është gjetur përkrah shqiptarëve duke sakrifikuar shpeshherë edhe vetveten, shkruan albinfo.ch. Me shpirtin e tij human dhe me energjinë e pashtershme  për punë ka organizuar  aktivitete të shumta në dobi të çështjes shqiptare. Fjala e tij  përherë ka qenë me peshë, ngase Leuenberger, njihet edhe si njëri nga politikanët më të suksesshëm të Zvicrës.

Zoti Leuenberger  dymbëdhjetë  vjet me radhë ka  kryer funksionin e deputetit nacional në Parlamentin e Zvicrës. Po ashtu  mandatin e tij katërvjeçar si kryetar i Ekologëve të Zvicrës, e ka përfunduar duke bërë reforma rrënjësore dhe duke e përtërirë këtë Parti me të rinj e të reja profesionistë.

Gjatë mandatit të tij prioritet  çdoherë u ka dhënë të huajve, pa shikuar asnjëherë ngjyrën, fenë dhe përkatësinë e tyre.

Leuenberger me mërgatën shqiptare në  Zvicër, ka krijuar  lidhje  që në vitet e 70-ta. Duke njohur në thelb zullumin e sistemit komunist të ish-Jugosllavisë ndaj shqiptarëve, ai me tërë qenien  mbështeti lëvizjet  shqiptare në mërgim, të cilat nëpërmjet rrugëve paqësore kërkonin barazi me kombet e   tjera të ish- Jugosllavisë.

Ndaj shtypjes serbe fuqishëm ngriti zërin miku ynë i përhershëm Ueli Leuenberger, duke organizuar  me qindra manifestime proteste  në mbështetje të shqiptarëve të Kosovës para Kombeve të Bashkuara në  Gjenevë.

Veç kësaj  falë punës dhe kontributit të tij  në vjeshtën e vitit 1996  në zemër të Gjenevës, u themelua Universiteti Popullor Shqiptar, prej nga shqiptarë e zviceranë së bashku shpërndanin në të katër anët e botës të vërtetën mbi gjendjen në Kosovë, shkruan albinfo.ch Prandaj Leuenberger, me të drejtë nga të gjithë njihet edhe si  Mis Edith Durham i  Dytë i Shqiptarëve.

Nëpërmjet tij kemi fituar edhe miq të tjerë të  shumtë të cilët  na kanë  mbështetur dhe vazhdojnë të na mbështesin pa kurrfarë interesi edhe sot në ruajtjen e gjuhës dhe të trashëgimisë sonë kulturore.

Kjo mbështetje  u vërejt edhe në Manifestimin “ TE  RECUERDO” ku me iniciativën e zonjës Monique  Boget, ish- kryetare në tri mandate e komunës Meyrin të  Gjenevës, u përveshi në një program të përbashkët me këngëtarë dhe artistë më të mirë të këtij kantoni edhe  Ansambli i Këngëve dhe Valleve “ Gëzuar” i cili me lojën e tij të përkryer në vallëzim dhe këngë kënaqi të gjithë.  Performanca shumë e mirë e këtyre valltareve dhe solistëve të rinj  dhe pjesëmarrja në dhjetëra manifestime  kulturore të organizuara në Gjenevë dhe qytete të tjera të Zvicrës, i kishte shtyrë shumë personalitete të  shquara të këtij kantoni që ta jenë të pranishëm në këtë Mini Festival.

Stafi udhëheqës i Ansamblit “Gëzuar” dhe anëtarësia e gjerë u ndjenë tejet të kënaqur dhe të nderuar kur gjatë gjithë kohës,  lojës së bukur të vashave dhe djemve tanë u duartrokiti  miku ynë i madh, Ueli Leuenberger.

Ai në një prononcim enkas për Albinfo.ch  tha: “Veprat e mira të cilitdo komunitet qofshin duhet motivuar e përkrahur”.

Mjaft mbresëlënëse ishte edhe paraqitja e Grupeve muzikore nga vendet e Amerikës Latine, të cilat  në kuadër të këtij solemniteti  prezantuan  thesarin e pasur kulturor të vendeve të tyre të origjinës.