Nuk ka “pushim lehonie” për baballarët

Sipas propozimit, etërit gjatë dy javëve do të merrnin 80 për qind të të ardhurave të tyre të rregullta, ose maksimalisht nga 196 franga në ditë

Dhoma Nacionale e Parlamentit të Zvicrës është shprehur kundër pushimit dyjavor me pagesë të meshkujve kur ata bëhen prindër. Në sesionin e mbajtur sot, deputetët kanë hedhur poshtë iniciativën përkatëse të kolegut të tyre nga CVP/PDC Martin Candinas. 97 vota kanë qenë kundër, 90 pro dhe 5 të përmbajtura, shkruan nzz.ch. Me këtë votim, hiqet nga rendi i ditës çështja e pushimit të paguar atëror, transmeton albinfo.ch

Candinas kishte propozuar që pushimi i atësisë të financohej bazuar në rregulloren për kompensimin e të ardhurave. Sipas tij, etërit gjatë dy javëve të përmendura do të merrnin 80 për qind të të ardhurave të tyre të rregullta, ose maksimalisht nga 196 franga në ditë.

Kostoja prej rreth 200 milionë frangash në vit do të mbulohej nga punëdhënësit dhe punëmarrësit bashkërisht. Po ky model funksionon edhe në pushimin e lehonisë për nëna, të cilat nga viti 2005  kanë të drejtë në 14 javë pushim të paguar.