Në vitin 2020, Zvicrës do t’i mungojnë 2.000 mjekë familjeje

Vazhdimësia e mjekëve të familjes nuk është e sigurt. Zvicrës do t’i mungojnë afro 2.000 mjekë të përgjithshëm në këto katër vjetët e ardhshëm dhe më shumë se 4.000 mjekë deri në vitin 2025. Për të trajtuar këtë mungesë, aftësitë e asistentëve dhe infermierëve në veçanti do të duhet të përforcohen.
“Dekadën e ardhshme, më shumë se 60% e mjekëve familjarë që praktikojnë sot do të pushojnë veprimtarinë e tyre”, paralajmëroi Shoqata Mjekët e Familjes dhe Fëmijës (MEF) të enjten në një deklaratë.

Rreth gjysma e mjekëve të familjes duan ose kanë nevojë të vazhdojnë të punojnë deri në moshën 70-vjeçare mesatarisht. Rezultati, mjekët e përgjithshëm “përbëjnë një kolektiv tepër të moshuar, për të cilët një vazhdimësi për të rinjtë nuk është e siguruar”.

Tashmë mungojnë afro 2000 mjekë të familjes që punojnë me kohë të plotë për të arritur kujdesin mjekësor të rekomanduar për 1.000 persona. Për të mbushur këtë boshllëk, më shumë se 4.000 mjekë të rinj të familjes me kohë të plotë do të jenë të nevojshme gjatë dekadës së ardhshme. Në afat të gjatë, Zvicra duhet të formojë më shumë mjekë, sipas komunikatës së presidentit të Shoqatës, Marc Müller, përcjell albinfo.ch.

Një opinion i ndarë edhe nga Shoqata Mjekësore zvicerane. FMH (Swiss Medical Association) ka gjykuar të domosdoshme rritjen e numrit të vendeve të studimit.
Nëse sot kujdesi mjekësor i popullsisë mund të jetë i garantuar në sajë të personelit të huaj, duhet të marrim parasysh progresin demografik, mjekësor dhe teknik si dhe rritjen e numrit të sëmundjeve kronike. Ne duhet të sigurojmë në afat të gjatë funksionimin e sistemit shëndetësor, theksoi FMH.

100 milionë më shumë për trajnim

Këshilli Federal është i gatshëm të investojë 100 milionë franga në krijimin e 200 deri në 250 vendeve të tjera të studimit në mjekësi. Vendimi përshëndetet nga trupi shëndetësor.