Familja e pesë shahistëve të suksesshëm

Gjermani: Pesë emra të bukur të fëmijëve shqiptarë të familjes Rahimi, fitues të shumë trofeve në shah

„Të kalosh kohën duke luajtur shah, kërkohet përqendrim i madh dhe kjo nuk eshtë e lehtë nëse shahun nuk e ke pasion“, thotë gjimnazistja Rozafa Rahimi. Vajza e re me prejardhje nga Shkupi ka lindur dhe jeton në Siegen të Gjermanisë.  Tërë kohën e lirë ajo ia kushton shahut.

„Po, unë dhe familja ime luajmë çdo ditë shah“, thotë Rozafa për albinfo.ch.

Janë pesë fëmijë dhe që të gjithë luajnë shah. Më i vogli i tyre Kroni është 8 vjeç dhe në garat e fundit komunale ka zënë vendin e parë.

Vajza e dytë, Anita, së fundmi ka përfaqësuar si 17 vjeçe gjatë vitit 2015 Republikën e Nordrheinwestfalen-it në garat e Gjermanisë për të rin, të quajtura „Deutsche Jugend Einzel Meisterschaft U18“, dhe është radhitur e 9-ta në mesin e 24 pjesëmarrësve.

Shahisti i tretë i familjës Rahimi quhet Vranakont. Ai sot është 17 vjeç dhe talenti i tij në këtë sport është vënë re që në moshën 6 vjeçare duke mundur kundërshtarin e tij pa i shënuar lëvizjet, sepse, siç tregon ai, asokohe ende nuk dinte shkrim-lexim.

„Pasi e kam fituar lojën, babai i djalit kundërshtar është ankuar se unë nuk i kam shënuar lëvizjet, por ankesa është refuzuar nga juria për shkak të moshës sime parashkollore“, tregon Vranakonti.

Dy vajzat e para të Rahimit, Rozafa dhe Anita, kanë përfaqësuar Republikën e Nordrheinwestfalen-it në Kampionatin Gjerman të shahut për tetë vite duke qenë në garë me përfaqësuesit e 16 republikave (të njohura ndryshe si Bundesländer).

Konkurrenca në familje është e madhe, por më së shumti trofe e medalje në shtëpi kanë sjellë, babai dhe Anita, tregon vajza e madhe, Rozafa.

Këtë sport ata e kanë mësuar nga i ati, Rahimi. Ai ka emigruar para 22 vjetësh në Gjermani. „Shahun e kam dashur gjithmonë“, thotë ai. „Duke luajtur shah, njeriu mëson durimin dhe përqendrimin“. Rahimi luan në ekipin e parë të klubit dhe njihet si fitues i dhjetëra trofeve.

„Kemi aq shum medalje e kupa sa që jemi detyruar t`i zhvendosim në bodrum sepse nuk kishim më vend ku ti vendosnim“, thotë ai.

Pranvera është 11 vjeçe dhe bashkë me Kronin, kanë zënë vendin e parë vitin e kaluar në grupmoshat e tyre të garave komunale.

Konkurrencë e madhe brenda familjes

Dy vajzat e para të Rahimit, Rozafa dhe Anita, kanë përfaqësuar Republikën e Nordrheinwestfalen-it në Kampionatin Gjerman të shahut për tetë vite duke qenë në garë me përfaqësuesit e 16 republikave.Konkurrenca në familje është e madhe, por më së shumti trofe e medalje në shtëpi kanë sjellë, babai dhe Anita, tregon vajza e madhe, Rozafa