Gjenevë: Planifikohen bisedime indirekte për Sirinë

Regjimi i Damasit si dhe opozita janë duke u përgatitur për t’u dhënë një shans përpjekjeve diplomatike në Gjenevë për ta qetësuar situatën në Siri. Pritet që ata të bisedojnë veç e veç të hënën me OKB-në, e cila mbikëqyr procesin.

Në Pallatin e Kombeve të Bashkuara në Gjenevë i dërguari Staffan de Mistura i OKB-së duhet të presë emisarët e regjimit të Damaskut në fund të mëngjesit dhe delegatët e opozitës pasdite vonë. Armiqtë sirianë nuk kanë kontaktuar më që nga një përpjekje për ndërmjetësim, e cila pati dështuar më 2014.

Staffan de Mistura dëshiron të mundësojë një dialog indirekt mes dy palëve, falë emisarëve, të cilët do të jenë përçuesit e dy palëve. Ky proces mund të zgjasë gjashtë muaj, një afat i caktuar nga OKB-ja, për të arritur në krijimin e një autoriteti transitor, i cili do të ketë për detyrë organizimin e zgjedhje në mes të vitit 2017.

Por, diskutimet, të cilat kanë filluar të premten ndërmjet OKB-së dhe delegacionit të regjimit të Damaskut, nuk kanë arritur akoma të nisin. Procesi i lartpërmendur kërcënohet të dështojë para se të fillojë, opozita kërkon gjeste humanitare, të cilat aktualisht nuk vijnë. Në të kundërtën. Lufta, sulmet, atentatet e civilët e uritur vazhdojnë të përbëjnë përditshmërinë e Sirisë.

Pavarësisht hendekut mes dy palëve, zoti De Mistura pohon se është “optimist dhe i vendosur” për të vazhduar përpjekjet e tij. “Kjo është një mundësi historike që nuk duhet të na shpëtojë”, theksoi ai.

Në një mesazh të pazakontë video, Sekretari amerikan i Shtetit, John Kerry, u ka nisur edhe një apel solemn armiqve të Sirisë për t’i nxitur që të “kapin” mundësinë për t’i dhënë fund luftës vrasëse dhe shkatërruese qe gati pesë vjet.

Konflikt vrasës

“Le të jemi realistë. Ne kemi ardhur nga larg, kemi dy palë, të cilat nuk kanë folur qe dy vjet (që nga bisedimet e para në vitin 2014) dhe gjatë këtyre dy vjetëve tmerret kanë vazhduar, situata është përkeqësuar”, përmbledh një diplomat perëndimor.

Bashkësia ndërkombëtare është duke kërkuar një fund të negociuar për luftën në Siri. Që nga marsi i vitit 2011 konflikti ka marrë jetën e më shumë se 260.000 vetave dhe ka shtyrë me miliona njerëz të largohen nga shtëpitë e tyre.

Zgjerimi i shtetit islamik

Kaosi sirian ka ndihmuar gjithashtu ngritjen e grupit të shtetit islamik (EI), i cili pushtoi një pjesë të madhe të territorit, ku xhihadistët e huaj kanë formuar edhe autorët e sulmeve të nëntorit në Paris. Të dielën një sulm antishiitë i organizuar nga shtetit islamik ka vrarë të paktën 70 njerëz në afërsi të Damaskut.