Lajme

6 diplomatë rusë shpallen ‘non grata’ në Mal të Zi

Në arsyetimin e vendimit thuhet se ata shpallen non grata “për shkak të veprimtarive që janë në kundërshtim me Konventën e Vjenës"

Përmes një njoftimi, Ministria e Jashtme e Malit të Zi ka bërë të ditur se ka shpallur persona non grata gjashtë diplomatë rusë të akredituar në Podgoricë.

Në arsyetimin e vendimit thuhet se ata shpallen non grata “për shkak të veprimtarive që janë në kundërshtim me Konventën e Vjenës për marrëdhëniet diplomatike dhe marrëdhëniet e vlerësimit dhe respektit të ndërsjellë mes dy vendeve”.

Agjencitë ligjzbatuese në Malin e Zi kanë ndërmarrë të enjten një operacion masiv kundër një grupi personash që dyshohen si agjentë të spiunazhit rus.

Autoritetet lokale kanë deklaruar se forcat speciale, nën drejtimin e Agjencisë për Sigurinë Kombëtare dhe Prokurorisë së Posaçme, kanë arrestuar dhjetëra persona në Podgoricë.

Sipas burimeve zyrtare, të arrestuarit janë kryesisht shtetas rusë, por edhe malazezë, mes të cilëve një funksionar i administratës shtetërore.