Lajme
544 persona u arrestuan në Turqi nën dyshimet për lidhje me Gylenin
Autoritetet turke njoftuan të martën arrestimin e 544 personave të dyshuar si të lidhur me predikuesin Fethullah Gylen, i cili është i “urryeri” i presidentit Rexhep Tajip Erdogan, i cili e akuzon atë se ka orkestruar një përpjekje për puç në vitin 2016.
Operacioni, i kryer në 62 nga 81 provincat e Turqisë, synonte “individë që synonin të integronin nivele të ndryshme të shërbimit publik nga Feto”, një akronim i përdorur nga Ankaraja për të përcaktuar lëvizjen fetare gyleniste.
Të dyshuarit akuzohen se janë regjistruar për provimet e shërbimit civil me urdhër të lëvizjes gyleniste dhe se kanë përdorur shërbimin e mesazheve Bylock për të shkëmbyer mesazhe, që Ankaraja konsideron se u përkasin mbështetësve të predikuesit.
Në mërgim vullnetar përtej Atlantikut që nga viti 1999, Fethullah Gylen, në krye të një lëvizjeje sa të fuqishme, aq edhe të errët, mbahet përgjegjës për tentativën për grusht shteti të korrikut 2016, të cilën ai e ka mohuar gjithmonë.
Dikur një aleat i vlefshëm i Presidentit Erdogan, predikuesi mysliman, 83 vjeç, sipas gjendjes civile, ishte akuzuar nga autoritetet turke se ishte në origjinën e dyshimeve për korrupsion që synonin qeverinë në dhjetor 2013, kur Rexhep Tajip Erdogan ishte ende kryeministër.
Që nga tentativa për grusht shteti, kreu i shtetit e ka akuzuar imamin, në krye të një lëvizjeje të pranishme në të gjitha kontinentet, veçanërisht nëpërmjet një rrjeti të gjerë shkollash private, se ka krijuar një shtet paralel që synon ta rrëzojë atë.
Që nga ky grusht shteti i dështuar, autoritetet turke kanë bërë më shumë se 300,000 arrestime, veçanërisht në radhët e policisë, gjyqësorit dhe ushtrisë dhe në mesin e intelektualëve.
Ndaj rreth 700,000 personave u nisën ndjekjet penale dhe 3,000 prej tyre, të akuzuar se kishin luajtur rol në grushtin e dështuar të shtetit, u dënuan me burgim të përjetshëm.
Turqia kërkon rregullisht nga vendet perëndimore ekstradimin e aktivistëve gylenistë që jetojnë në tokën e tyre.
Edhe Ankaraja e kishte bërë një nga kushtet për ratifikimin nga Parlamenti turk të pranimit të Suedisë dhe Finlandës në NATO, përpara se ta shpërfillte përfundimisht./RTS
