Alarm në aeroportin e Frankfurtit: Një viktimë dhe pesë të infektuar me malarie

Aeroporti i Frankfurtit

Një rast i pazakontë i malaries ka shkaktuar alarm në aeroportin e Frankfurtit në Gjermani, ku një punonjës ka humbur jetën dhe pesë të tjerë janë infektuar me sëmundjen.

Kompania “Fraport”, e cila menaxhon aeroportin, konfirmoi se pesë punonjësit e prekur po marrin trajtim mjekësor.

Autoritetet dyshojnë se infeksioni mund të jetë shkaktuar nga një mushkonjë e infektuar që ka mbërritur në Gjermani me avion nga një rajon ku malaria është e përhapur. Sipas hetimeve fillestare, insekti mund të ketë hyrë në vend gjatë muajit korrik.

Në kuadër të masave parandaluese, në ambientet e aeroportit janë vendosur kurthe për mushkonjat. Mostrat e mbledhura do të analizohen në laborator për të përcaktuar nëse kanë lidhje me rastet e raportuara.

Punonjësve të aeroportit u është bërë thirrje që, nëse shfaqin simptoma të dyshimta, të kërkojnë menjëherë këshillë mjekësore dhe të informojnë mjekun se punojnë në aeroport.

Instituti “Robert Koch” e ka cilësuar këtë mënyrë të transmetimit të malaries si jashtëzakonisht të rrallë. Raste të tilla, të njohura si “malaria e aeroportit”, mund të shfaqen kur mushkonja të infektuara transportohen në mënyrë të pavullnetshme nga zona endemike drejt vendeve ku sëmundja zakonisht nuk qarkullon.

Malaria shkaktohet nga parazitët që transmetohen përmes pickimit të mushkonjave të infektuara të llojit “Anopheles”. Simptomat mund të përfshijnë temperaturë të lartë, dhimbje koke dhe probleme me frymëmarrjen, ndërsa në format më të rënda sëmundja mund të shkaktojë komplikime serioze, përfshirë koma dhe vdekjen.