Zvicra nis shkëmbimin automatik të të dhënave të pagave me Francën dhe Italinë

(KEYSTONE/Alessandro Della Bella)

Nga 1 janari 2027, Zvicra do të vendosë në fuqi ligjin federal për shkëmbimin automatik ndërkombëtar të të dhënave të pagave, duke krijuar bazën ligjore për zbatimin e marrëveshjeve të arritura me Francën dhe Italinë.

Këshilli Federal mori vendimin më 19 gusht, ndërsa ndryshimi ka rëndësi të veçantë për punëtorët ndërkufitarë, të cilët jetojnë në Francë ose Itali, por punojnë në Zvicër. Qëllimi është që autoritetet tatimore të kenë informacionin e nevojshëm për përcaktimin korrekt të detyrimeve tatimore të këtyre punonjësve, shkruan The Local, transmeton albinfo.ch.

Në rastin e Italisë, baza e këtij bashkëpunimi lidhet me marrëveshjen e arritur mes dy vendeve në dhjetor të vitit 2020 për rregullat e reja të tatimit të punëtorëve ndërkufitarë. Kjo marrëveshje zbatohet që nga 1 janari 2024 dhe parashikon shkëmbim automatik dhe reciprok të informacioneve të nevojshme për tatimin e këtyre punëtorëve në vendin ku ata banojnë.

Ndërkohë, Zvicra dhe Franca nënshkruan në qershor të vitit 2023 një marrëveshje shtesë në kuadër të marrëveshjes për shmangien e tatimit të dyfishtë. Ajo rregullon, ndër të tjera, edhe çështjen e punës nga distanca dhe zbatohet që nga 1 janari 2026. Marrëveshja parashikon shkëmbimin reciprok të informacioneve që nevojiten për tatimin e personave që jetojnë në njërin shtet dhe punojnë për një punëdhënës në shtetin tjetër.

Ligji i ri federal përcakton gjithashtu mënyrën se si të dhënat e pagave do të shkëmbehen brenda sistemit zviceran. Informacionet relevante do të qarkullojnë ndërmjet autoriteteve tatimore kantonale dhe Administratës Federale Tatimore, duke mundësuar më pas zbatimin e shkëmbimit të paraparë me Francën dhe Italinë.

Ligji ishte miratuar nga Parlamenti zviceran më 19 dhjetor 2025, ndërsa afati për referendum kaloi pa u shfrytëzuar. Pas konsultimeve me kantonet, Këshilli Federal ka përcaktuar gjithashtu me një urdhëresë mënyrën e autentifikimit të autoriteteve tatimore kantonale për qasje në të dhënat e pagave që mbahen nga Administrata Federale Tatimore. Si ligji, ashtu edhe urdhëresa përkatëse, do të hyjnë në fuqi më 1 janar 2027.

Me këtë sistem, Zvicra synon të krijojë një procedurë më të standardizuar dhe automatike për shkëmbimin e informacioneve tatimore me dy vendet fqinje, veçanërisht në një treg pune ku një numër i madh njerëzish kalojnë kufirin për të punuar.