Swoboda: Mungesë e stabilitetit politik në Kosovë

“Është një keqardhje e thellë që Kosova ende nuk po mund të gjejë stabilitet politik”, ka deklaruar nënkryetari i Fraksionit Social-Demokrat (SPÖ) në Parlamentin evropian, Hannes Swoboda për votimin e së martës në Kuvendin e Kosovës, në kuadër të formimit të Qeverisë së re, zgjedhjes së kryeministrit, si dhe zgjedhjes së kryetarit të vendit.

“Ngjarjet për zgjedhjen e  kryetarit të shtetit, pas zgjedhjeve të ndërlikuara parlamentare nuk janë ndonjë faqe e ndritshme. Deri më tani, lufta kundër korrupsionit – detyrë primare e Kosovës, ka sjellë shumë pak fryte.

Duhet përqendruar vëmendjen nëse kryetari i ri, i cili është një sipërmarrës, do të shprehë gatishmërinë e duhur që të vazhdojë këtë detyrë”, ka deklaruar Swoboda përmes shërbimit të shtypit të SPÖ.

Kryetari i grupit punues për Ballkanin Perëndimor në Parlamentin Evropian, ka kritikuar se udhëheqësia e Kosovës është shumë pak e përgatitur për bisedimet e domosdoshme paraprake me Serbinë. Po të dëshirojnë të ruajnë veriun e vendit, i cili është i dominuar nga serbët, forcat e vendit do të duhet të sjellin ide të reja për zhvillimin e autonomisë dhe integrimit, ka thëne Swoboda.

“Duke pasur parasysh paqëndrueshmërinë e brendshme dhe përçarjet në Shqipëri dhe Maqedoni, Kosova do të duhet të bëjë përpjekje të posaçme për të justifikuar Pavarësinë dhe stabilitetin e vendit. Gjatë kësaj, Bashkimi Evropian mund të ndihmojë, por politikanët kosovarë duhet urgjentisht t’i bëjë detyrat e tyre të shtëpisë.