Rritet përdorimi i kondicionerëve në Zvicër, por kostoja dhe kufizimet mbeten të larta

@pixabay

Valët gjithnjë e më të shpeshta të të nxehtit po rrisin kërkesën për kondicionerë në Zvicër, veçanërisht në pjesën frankofone të vendit. Megjithatë, kostot e larta, procedurat administrative dhe shqetësimet mjedisore po e bëjnë instalimin e tyre një sfidë.

Përballë temperaturave gjithnjë e më të larta, gjithnjë e më shumë familje në Zvicër po blejnë kondicionerë. Sipas të dhënave të cituara nga RTS, shitjet e këtyre pajisjeve në vitin 2025 u rritën ndjeshëm, ndërsa në platformën Galaxus ato u trefishuan mes qershorit 2024 dhe qershorit 2025.

Kondicionerët portativë janë alternativa më e lirë, me çmime që variojnë nga rreth 300 deri në 1000 franga. Megjithatë, ato janë më pak efikase, më të zhurmshme dhe kërkojnë hapjen e një daljeje për ajrin e nxehtë. Një ventilator, ndërkohë, konsumon mesatarisht rreth 20 herë më pak energji elektrike.

Sistemet fikse janë më efikase dhe më të qeta, por shumë më të shtrenjta. Instalimi për një dhomë mund të kushtojë 4000-5000 franga, ndërsa për një shtëpi të tërë kostoja mund të arrijë në 20 mijë franga ose edhe më shumë.

Përveç kostos, banorët përballen edhe me rregulla të ndryshme nga një kanton në tjetrin. Në disa kantone kërkohet që një pjesë ose e gjithë energjia e përdorur nga kondicioneri të kompensohet me burime të rinovueshme. Në Gjenevë, rregullat janë veçanërisht të rrepta dhe kërkohet të dëshmohet nevoja për kondicionim.

Sipas autoriteteve të Gjenevës, një banesë duhet të ketë fillimisht masa për mbrojtjen nga dielli dhe për largimin e nxehtësisë. Vetëm nëse, edhe pas këtyre masave, temperatura kalon 26.5 gradë për më shumë se 400 orë në vit, mund të jepet autorizimi.

Kufizimet kanë nxitur edhe instalime të paautorizuara. Një përfaqësues i sektorit pretendon se rreth 70% e kondicionerëve fiksë në Gjenevë janë instaluar pa leje, shifër që autoritetet kantonale thonë se nuk është e dokumentuar në mënyrë objektive.

Në nivel global, përdorimi i kondicionerëve po rritet me shpejtësi. Në botë janë në përdorim më shumë se 2.5 miliardë pajisje dhe konsumi i energjisë për ftohje është dyfishuar që nga viti 2000. Agjencia Ndërkombëtare e Energjisë parashikon që ky konsum mund të trefishohet deri në vitin 2050.

Megjithatë, ekspertët dhe autoritetet përballen me një dilemë të vështirë: kondicionerët rrisin konsumin e energjisë dhe ndikojnë në klimë, por gjatë valëve ekstreme të të nxehtit mund të jenë të rëndësishëm për mbrojtjen e shëndetit dhe shpëtimin e jetëve.

Ndërkohë, Gjeneva po shqyrton lehtësimin e rregullave për instalimin e kondicionerëve, me ndryshime të mundshme që mund të hyjnë në fuqi gjatë verës së vitit 2027.