Pas 34 vjetësh, gjenden trupat e dy alpinistëve në një akullnajë në Zvicër

Zbulimi pas më shumë se tri dekadash lidhet me tërheqjen dhe shkrirjen e akullnajave zvicerane

Trupat e dy alpinistëve belgë, të cilët ishin zhdukur 34 vjet më parë, janë gjetur në akullnajën Trift në kantonin Valais të Zvicrës. Identiteti i tyre është konfirmuar përmes analizave të ADN-së.

Mbetjet mortore u zbuluan më 26 korrik 2026 në territorin e komunës Saas-Grund. Pas operacionit të rikuperimit, trupat u dërguan në Institutin e Mjekësisë Ligjore të Spitalit të Valais në Sion për identifikim.

Policia kantonale e Valais njoftoi se krahasimi i drejtpërdrejtë i profileve të ADN-së konfirmoi se bëhej fjalë për dy alpinistë belgë, të cilët ishin 39 dhe 41 vjeç në momentin e zhdukjes së tyre në vitin 1992, shkruan Swissinfo.ch, transmeton albinfo.ch.

Dy burrat ishin nisur më 4 shtator 1992 nga streha Weissmies me synimin për të ngjitur majën Weissmies, në lartësi prej 4,017 metrash. Ata arritën deri te streha Almagell, por u përballën me kushte shumë të këqija atmosferike dhe nuk arritën kurrë në destinacion.

Në muajt pas zhdukjes ishin zhvilluar disa operacione kërkimi. Gjatë tyre ishte gjetur një çantë shpine, por jo alpinistët.

Zbulimi pas më shumë se tri dekadash lidhet me tërheqjen dhe shkrirjen e akullnajave zvicerane. Policia e Valais thekson se, ndërsa akullnajat tërhiqen, herë pas here dalin në sipërfaqe mbetje të personave që janë zhdukur në male shumë dekada më parë.

Policia kantonale mban një listë të personave të zhdukur që përfshin raste të regjistruara që nga viti 1925, shumica prej tyre të lidhura me zhdukje në zonat e larta malore, lumenj dhe liqene.

---