Mungesa e çipave frenon prodhimin e veturave 

Marka kryesore e veturave të Volkswagen AG pret që mungesa globale e çipave të frenojë prodhimin e veturave në muajt e ardhshëm, por prodhimi i veturave elektrike aktualisht nuk ndikohet nga ngërçet e furnizimit.

Mungesa e çipave mund të fillojë të lehtësohet në gjysmën e dytë të vitit, ka thënë shefi i markës së VW-së, Ralf Brandstaetter, për DPA në një intervistë të shtunën. Kompania ka në plan të kompensojë prodhimin e humbur sa më shumë që të jetë e mundur gjatë vitit.

Prodhuesi më i madh i veturave në Evropë paralajmëroi në dhjetor se mungesa në të gjithë botën do të frenojë prodhimin e veturave, duke vlerësuar se prodhimi i më shumë se 100.000 veturave mund të jetë në rrezik. Pengesat që ndikojnë në të gjithë industrinë u përkeqësuan nga një zjarr në një fabrikë të çipave Renesas Electronics Corp në Japoni dhe stuhia e dimrit në Teksas këtë vit.

VW do të zvogëlojë 4.000 punë administrative dhe do të shtojë 2.000 pozicione për operacione digjitale. Kompania gjithashtu vazhdon të zvogëlojë kompleksitetin e prodhimit për të ulur kostot dhe për të kufizuar punësimin e jashtëm sa më shumë që të jetë e mundur.