Bajramaj, komentatore e Evropianit

Gazeta gjermane “Rheinische Post” e ka rezervuar Fatmiren që të bëjë komentimin e Kampionatit Evropian të Futbollit

Futbollistja e famshme shqiptare e kombëtares gjermane Fatmire “Lira” Bajramaj përveç në fushën e futbollit po vlerësohet edhe jashtë saj. Gazeta gjermane “Rheinische Post” e ka rezervuar Fatmiren që të bëjë komentimin e Kampionatit Evropian të Futbollit që do të mbahet nga 8 deri më 1 korrik në Poloni dhe Ukrainë.

“Lira” deri më tash ka luajtur 57 ndeshje për kombëtaren gjermane me të cilën ka fituar një titull kampioni botëror dhe një evropian. Ndërsa në Olimpiadën e vitit 2008 në Peking, kjo kombëtare kishte fituar medaljen e bronztë. Në vitin 2011 ajo është zgjedhur futbolliste e vitit në Gjermani

Fatmire Bajramaj ka ardhur me familjen nga Kosova në Gjermani si vogëlushe 5 vjeçare. Pjesën më të madhe të fëmijërisë e ka kaluar në Mönchengladbach.

Aktualisht ajo luan për FFC Frankfurt.