Ambasada e Shqipërisë apel qytetarëve pas tërmetit në Japoni: Ndiqni udhëzimet e autoriteteve vendase

Foto nga arkiva Keystone (AP Photo/Visar Kryeziu)

Ministria për Evropën dhe Punët e Jashtme e Shqipërisë, ka ndarë mesazhin e ambasadorit të Shqipërisë në Japoni, Ermal Muça, pas tërmetit të regjistruar në orët e para të mëngjesit të sotëm, me epiqendër në prefekturën Ibaraki, i cili u ndje edhe në zonën e Tokios.

Sipas njoftimit nga ambasada, deri më tani nuk raportohen viktima apo dëme të mëdha, ndërsa janë raportuar persona të lënduar, të cilëve ambasada u ka uruar shërim të shpejtë.

Në kushtet e situatës së krijuar nga tërmeti, por edhe nga reshjet e dendura të ditëve të fundit, Ambasada e Republikës së Shqipërisë në Japoni u ka bërë thirrje shtetasve shqiptarë që jetojnë në Japoni, si dhe atyre që ndodhen për vizitë në vend, të ndjekin me vëmendje informacionet zyrtare dhe të zbatojnë udhëzimet e autoriteteve vendase, transmeton albinfo.ch.

Ambasada rekomandon që qytetarët të informohen për situatën përmes burimeve zyrtare të autoriteteve japoneze, përfshirë Agjencinë Meteorologjike të Japonisë (JMA), portalin e parandalimit të fatkeqësive të Ministrisë së Tokës, Infrastrukturës, Transportit dhe Turizmit, si dhe NHK WORLD-JAPAN.

Tutje janë vënë në dispozicion edhe kontaktet për raste nevoje. Shtetasit shqiptarë mund të kontaktojnë ambasadën në WhatsApp në numrin +81–70-9023-3905 ose përmes adresës elektronike [[email protected]](mailto:[email protected]).

Ambasada u kërkon qytetarëve shqiptarë në Japoni të tregojnë kujdes dhe të respektojnë udhëzimet e autoriteteve vendase për garantimin e sigurisë së tyre.