Afër 200 mijë zarfe për diasporën për zgjedhjet në Shqipëri

Çdo votë që mbërrin në Shqipëri pas datës 11 maj, ora 19:00, do të konsiderohet e pavlefshme

Procesi i votimit të shqiptarëve që jetojnë jashtë vendit vijon, ndërsa janë 193,823 zarfe të marra nga zgjedhësit të cilët janë regjistruar për të marrë pjesë në zgjedhjet parlamentare të 11 majit.

Sipas shifrave të bëra publike nga kryekomisioneri Ilirjan Celibashi “rreth 22% e zarfeve të fletëve të votimit të dërguara tek zgjedhësit që jetojnë jashtë territorit të Shqipërisë, tashmë janë kthyer në Komisionin Qendror të Zgjedhjeve”.

Përkthyer në shifra, sipas të dhënave të KQZ-së janë 55 761 zarfeve të mbërritura në KQZ, transmeton albinfo.ch.

Votuesit në diasporë kanë kohë ta plotësojnë dhe ta dërgojnë fletën e votimit me postë deri në javën e parë të muajit maj. Çdo votë që mbërrin në Shqipëri pas datës 11 maj, ora 19:00, do të konsiderohet e pavlefshme.

Vendi i caktuar për administrimin e këtij procesi është Pallati i Sportit “Feti Borova”, pranë Parkut Olimpik Tiranë. Aty po përgatiten dhe dërgohen fletët e votimit dhe po aty do të kryhet numërimi i votave të diasporës.

---