Performanca e të rinjve nga Kosova ndez emocionet e publikut në Cyrih

Kanë vazhduar në Cyrih aktivitetet për nder të Ditës së Flamurit. Nxënësit e kolegjit “Mehmet Akif” nga Kosova, shfaqën programin e tyre artistik me motive shqiptare, që ngjallën emocion te publiku

Këngë, valle, poezi e monologje shqip, performuan në Cyrih, nxënësit nga Kosova.

Me paraqitjet e tyre prej artistësh edhe pse ishin vetëm rreth të 15-ve, këta nxënës, bënë që publiku, ndonëse në numër simbolik, të emocionohej deri në mospërmbajtje të lotëve.

Nxënësit e kolegjit “Mehmet Akif” nga Kosova, kishin shprehur dëshirë qysh vitin e shkuar të vinin në Zvicër, për t`i shfaqur vlerat dhe dijen e tyre, por kjo siç thanë ata, nuk u realizua për shkak të pamundësisë së sigurimit të vizave.

Megjithatë kjo u realizua këtë vit, falë mbështetjes së shkollës “SERA Schule” në Cyrih, por edhe të disa prindërve që, pavarësisht se jetojnë në Zvicër, fëmijët e tyre po i shkollojnë në kolegjin “Mehmet Akif” në Kosovë.

Në këtë shfaqje kulturore, nuk kishin si të mungonin përfaqësuesit nga Konsullata kosovare dhe nga Qendra Kzlturore në Cyrih, Islam Spahiu e Shukrije Ramadani.

Spahiu theksoi se bashkëpunimi i shkollave shqipe nga Kosova me shkollat në Zvicër duhet të jetë më i shpeshtë.

“Le të jetë ky program i kësaj shkolle, një shembull edhe për shkollat tjera shqipe nga Kosova, që të gjejnë rrugë bashkëpunimi me shkollat zvicerane dhe të marrin model nga to, për mënyrën e edukimit dhe shkollimit”.

Ndërkaq ushtruesja e detyrës së drejtorit të Qendrës Kulturore të Kosovës në Cyrih Shukrije Ramadan, tha se ky është rast i veçantë, për të pasur mysafirë nga Kosova.

“U themi mysafirë, por për ne nuk jeni, ju jeni vëllëzërit dhe motrat tona. Megjithatë këtë nuk mund ta ndjeni pa qenë të mërguar. Por ajo që dua të them është: mos u ndalni duke mësuar dhe më vonë të transmetoni dijen tuaj në forcimin e shtetit të Kosovës”, theksoi Ramadani.

Ndërkaq pjesëmarrësit në këtë ngjarje thanë se nuk ka çmim që mund ta paguajë këtë mbrëmje të veçantë, këtë kënaqësi që ndjemë nga kjo shfaqje, për Ditën e Flamurit.