Zvicra do të votojë për rregulla më të lehta të natyralizimit në shkurt, ndërsa viruset e “dimrit” kanë filluar tashmë të përhapen, janë disa nga lajmet që e karakterizuan këtë javë.
Zvicra do të votojë për rregulla më të lehta të natyralizimit
Nisma e diskutueshme në Zvicër për shkurtimin e periudhës së qëndrimit të kërkuar për natyralizim do të hidhet në votim në një referendum më 28 shkurt.
Propozimi (i njohur gjithashtu si “Nisma për Demokracinë”) synon të shkurtojë kohën e pritjes përpara se një i huaj të mund të aplikojë për shtetësi, duke e ulur atë nga 10 vite qëndrimi aktualisht, në pesë vite.
Nisma gjithashtu kërkon që qeveria federale të marrë përgjegjësinë për natyralizimin, në mënyrë që procedura të jetë e njëtrajtshme në të gjithë vendin.
Aktualisht, kantonet e veçanta mund të vendosin kriteret e tyre për natyralizimin, të cilat ndonjëherë janë më të rrepta se ato të përcaktuara nga autoritetet federale të migracionit.
Çfarë do të ndodhë me pensionin e 13-të nëse burimi i financimit hidhet poshtë në votime?
Pagesa e parë e pensionit të 13-të shtetëror është planifikuar për në dhjetor, por votuesit zviceranë duhet ende të miratojnë burimin e fondeve për këtë projekt të kushtueshëm, një rritje e Tatimit mbi Vlerën e Shtuar (TVSH).
Një referendum për këtë çështje do të mbahet më 29 nëntor.
Nëse votuesit e refuzojnë propozimin, pensioni gjithsesi do të paguhet, duke përdorur fonde nga rezervat ekzistuese të pensioneve.
Megjithatë, kjo do të thotë se këto rezerva do të pakësohen, ndaj duhet të gjenden urgjentisht burime alternative financimi për pensionin e 13-të.
Viruset e “dimrit” kanë filluar të përhapen në Zvicër
Viruset respiratore qarkullojnë në Zvicër ndërsa moti ftohet dhe, në disa raste, mund të shkaktojnë sëmundje të rënda.
Përveç rreth 200 llojeve të ftohjes së zakonshme, autoritetet shëndetësore paralajmërojnë gjithashtu se gripi, Covid-i, si dhe virusi sincicial respirator (RSV), janë tashmë të pranishëm në popullatë, ndërsa piku pritet të arrihet në javët dhe muajt e ardhshëm.
Të gjitha këto janë shumë ngjitëse, me simptoma që variojnë nga të lehta në të rënda. Autoritetet bëjnë të ditur se vaksinat për të treja rastet, veçanërisht për të moshuarit, personat me sëmundje kronike dhe ata me sistem imunitar të dobësuar, janë të disponueshme, raporton thelocal, transmeton albinfo.ch.
Zvicra përgatit një plan për të zbutur efektet e ndryshimeve klimatike
Pas temperaturave rekord dhe thatësirës ekstreme që goditën Zvicrën gjatë verës së vitit 2026, Këshilli Federal përcaktoi objektiva dhe masa kryesore që synojnë kufizimin e rreziqeve që lidhen me ndryshimet klimatike në Zvicër.
Për më tepër, qeveria njoftoi se janë marrë vendime lidhur me monitorimin e nxehtësisë dhe mbrojtjen e shëndetit të njerëzve dhe kafshëve.
“Objektivi është të forcohet kapaciteti përshtatës i mjedisit, shoqërisë dhe ekonomisë.”
Fëmijët në Zvicër nuk mund të “trashëgojnë” mbiemrat e dyfishtë të prindërve të tyre
Pas disa ndryshimeve ligjore, mbiemrat e dyfishtë do të lejohen në Zvicër duke filluar nga viti 2027, por vetëm për të rriturit.
Megjithatë, fëmijët do të kenë vetëm një mbiemër, ose atë të nënës, ose atë të babait.
Arsyeja për këtë vendim është thjesht praktike: për të parandaluar grumbullimin e mbiemrave ndër breza.
Rregulli i “mbiemrit të vetëm” vlen vetëm për fëmijët që janë shtetas zviceranë; për fëmijët e lindur në Zvicër nga prindër të huaj, rregullat janë më fleksibël.
Nëse shteti i origjinës së fëmijës lejon mbiemra të dyfishtë, ose nëse emra të tillë janë të zakonshëm atje, prindërit mund të kërkojnë që zyra e gjendjes civile në Zvicër t’i regjistrojë fëmijët e tyre me ato mbiemra.
Zvicra neutrale është një prodhues i madh armësh
Më 29 nëntor, votuesit zviceranë do të vendosin nëse qeveria e tyre duhet të ketë të drejtë të furnizojë me armë një shtet që është i përfshirë në një konflikt të armatosur.
Kjo ngre një pyetje të rëndësishme: pse një vend neutral merret fare me prodhimin dhe eksportin e armëve?
Ky vend prodhon pajisje të ndryshme ushtarake, armë të lehta, municione, automjete të blinduara dhe sisteme të mbrojtjes ajrore, por pse?
Qeveria shpjegon se kjo bëhet kryesisht për qëllime mbrojtjeje; po, Zvicra është neutrale, por bëhet fjalë për një neutralitet të armatosur.
“Zvicra ka forcat e veta të armatosura për të mbrojtur territorin dhe pavarësinë e saj,” deklaroi qeveria.
