Protesta e mbajtur sot në Tiranë është karakterizuar nga përplasje mes protestuesve dhe forcave të Policisë, përdorimi i mjeteve piroteknike dhe dëmtimi i pronës publike dhe private.
Përmes një deklarate zyrtare, Policia e Shtetit u ka bërë thirrje protestuesve të distancohen nga veprimet e dhunshme. Sipas autoriteteve, si pasojë e sulmeve të vazhdueshme janë plagosur 14 efektivë policie, ndërsa 35 persona janë shoqëruar deri më tani.
Policia ka bërë të ditur se po vazhdon punën për identifikimin dhe shoqërimin e personave të dyshuar për përfshirje në incidentet e dhunshme, përfshirë edhe ata që kanë qenë të maskuar gjatë tubimit.
Në reagimin e saj, Policia e Shtetit u ka kërkuar pjesëmarrësve të ndalojnë sulmet ndaj punonjësve të rendit dhe institucioneve shtetërore, si dhe dëmtimin e pronës publike e private.
Autoritetet kanë theksuar se e drejta për të protestuar është e garantuar me ligj, por kjo e drejtë nuk mund të përdoret si justifikim për dhunë apo për rrezikimin e jetës së policëve dhe qytetarëve.
Policia gjithashtu u ka bërë thirrje protestuesve të mos mbështesin personat e përfshirë në akte të dhunshme, duke paralajmëruar se të gjithë përgjegjësit do të identifikohen dhe do të përballen me ligjin.
Sipas njoftimit zyrtar, situata kërkon ndalimin e menjëhershëm të akteve të dhunës dhe rikthimin e rendit, në mënyrë që protesta të mos shndërrohet në një rrezik për sigurinë publike.
