Reshjet e ditëve të fundit kanë zbutur vetëm përkohësisht thatësirën në Zvicër. Situata e përgjithshme mbetet e tensionuar, sipas MeteoSwiss, raporton agjencia Keystone-SDA në një artikull të publikuar nga Swissinfo.
Në veri të Alpeve u regjistruan 20–40 milimetra reshje. Megjithatë, një pjesë e ujit avulloi ose u largua përmes rrjedhjes sipërfaqësore, duke mos e kompensuar mungesën e akumuluar, transmeton albinfo.ch.
Gjatë 30 ditëve të fundit, sasia e reshjeve ishte mesatarisht nën gjysmën e normales shumëvjeçare. Në disa zona, ajo arriti vetëm 15–35 për qind të nivelit të zakonshëm.
Pasojat janë veçanërisht të dukshme në Jura dhe në Rrafshnaltën Zvicerane, ku lumenjtë dhe liqenet vazhdojnë të kenë nivele shumë të ulëta. Në shumë stacione matëse janë regjistruar prurje që statistikisht shfaqen vetëm një herë në 10–30 vjet. Në rrjedhën e sipërme të Rinit janë matur edhe vlera rekord të ulëta.
Thatësira po mban të lartë edhe rrezikun nga zjarret në pyje. Sipas hartës së Zyrës Federale të Mjedisit, një brez nga Valaisi deri në St. Gallen ndodhet në nivel të lartë rreziku. Në pjesë të Valaisit të Epërm, rreziku vlerësohet shumë i lartë.
Për javën e ardhshme parashikohen kryesisht ditë pa reshje, me vetëm pak shi sporadik. Temperaturat maksimale në Zvicrën gjermanishtfolëse dhe atë perëndimore mund të arrijnë deri në 19 gradë.
Në një horizont më të gjatë, buletini i thatësirës parashikon se mungesa e reshjeve mund të zbutet gradualisht, pas një përkeqësimi të lehtë gjatë javës së ardhshme.
