Daniela Decurtins, drejtoreshë e Shoqatës Zvicerane të Industrisë së Gazit (ASIG), ka deklaruar se për momentin nuk ekziston rrezik i menjëhershëm për mungesë të gazit në Zvicër, edhe pse situata në tregjet evropiane mbetet e tensionuar.
Në një intervistë për portalin e specializuar për energji, Energate, ajo ka shpjeguar se lufta në Lindjen e Mesme ka shkaktuar pengesa në rrugë të rëndësishme të transportit, ndërsa rezervat e gazit në disa vende evropiane janë në nivele jashtëzakonisht të ulëta, transmeton albinfo.ch.
Sipas saj, një krizë furnizimi mund të ndodhë nëse disa faktorë negativë paraqiten njëkohësisht, si temperaturat shumë të ulëta gjatë dimrit, kërkesa e lartë për gaz në prodhimin e energjisë elektrike, mungesa e gazit natyror të lëngshëm (LNG) dhe ndërprerjet e mëtejshme në rrugët ndërkombëtare të furnizimit.
Gjermania mbetet vendimtare për furnizimin e Zvicrës
Një shqetësim i veçantë lidhet me nivelin e ulët të rezervave të gazit në Gjermani, e cila luan rol të rëndësishëm në furnizimin e tregut zviceran.
Në rast të një dimri të ftohtë, deri në 80 për qind e gazit që konsumon Zvicra mund të vijë përmes Gjermanisë.
Megjithatë, Decurtins ka theksuar se Zvicra ka mundësi të rrisë importet edhe përmes Francës dhe Italisë, duke zvogëluar varësinë nga një rrugë e vetme furnizimi.
Rezerva shtesë për dimrin 2026/2027
Për të shmangur një krizë të mundshme energjetike, kompanitë rajonale të gazit në Zvicër po përmbushin detyrimin për të krijuar rezerva jashtë vendit, të barabarta me 15 për qind të konsumit mesatar vjetor të gazit në Zvicër.
Një masë tjetër sigurie është marrë përmes një marrëveshjeje të re, e cila i mundëson Zvicrës, në rast nevoje, të përdorë deri në dy teravat-orë gaz nga sasitë që transportohen prej Francës drejt Italisë përmes territorit zviceran.
Kjo sasi është e garantuar për dimrin 2026/2027, me kusht që Zvicra të aktivizojë mundësinë e shfrytëzimit të saj.
A pritet shtrenjtim i gazit?
Pavarësisht masave të ndërmarra, çmimet e gazit në tregjet evropiane vazhdojnë të mbeten të larta dhe të paqëndrueshme.
Decurtins nuk ka dhënë parashikime konkrete për zhvillimin e çmimeve gjatë muajve të ardhshëm, duke theksuar se ato ndikohen drejtpërdrejt nga situata gjeopolitike dhe kushtet e furnizimit.
Megjithatë, ajo ka paralajmëruar se një dimër me temperatura shumë të ulëta mund të shkaktojë rritje të reja të çmimeve.
Për familjet dhe bizneset në Zvicër, kjo do të thotë se, megjithëse furnizimi me gaz aktualisht është i garantuar, shpenzimet për ngrohje mund të rriten nëse kushtet e tregut përkeqësohen gjatë sezonit dimëror.
