Studiuesit e syrit në qytetin zviceran të Bazelit shpresojnë për një përparim të rëndësishëm në trajtimin e personave të verbër, pas treguesve fillestarë pozitivë se një formë e re terapie është efektive.
Personat e verbër që mësojnë të shohin. Ajo që tingëllon si përrallë po bëhet realitet, të paktën në njëfarë kuptimi. Një terapi e re për sëmundjen e retinës të quajtur “retinitis pigmentosa”, e cila deri më tani është testuar vetëm te një numër i vogël njerëzish, po jep rezultate të jashtëzakonshme.
Me ndihmën e saj, personat e verbër arritën të dallonin të paktën konturet e objekteve të caktuara. Kjo raportohet në revistën e njohur shkencore “New England Journal of Medicine”.
Stefan Futterknecht nga Instituti i Oftalmologjisë Molekulare dhe Klinike në Bazel (IOB) është bashkautor i këtij studimi të botuar së fundmi. Ai është i bindur se këto gjetje do të jenë shumë të dobishme.
“Kjo ka hedhur themelet për zhvillimin e terapive më të sakta dhe më efektive në të ardhmen,” tha Futterknecht, i cili e përshkroi studimin si një “gur kilometrik për rikthimin e shikimit”.
Dallohen konturet e objekteve
Pesë vjet më parë u krye studimi i parë mbi këtë terapi gjenetike; në atë kohë, ai u zhvillua në Paris dhe përfshinte vetëm një person. Ai burrë fitoi përshtypjet e tij të para vizuale përmes kësaj terapie.
Pasi trajtimet fillestare rezultuan efektive te pacienti anonim që mori pjesë në testim, IOB kaloi në fazën tjetër.
Nga dhjetë pjesëmarrësit në studimin e ri dhe të zgjeruar, shumica përjetuan përmirësim, tha Futterknecht. “Shtatë nga dhjetë persona patën një rritje të ndjeshmërisë ndaj dritës.”
Për më tepër, katër nga tetë persona arritën të shihnin konturet e objekteve edhe të vogla, siç është një kuti shkrepësesh.
Sipas studimit, aftësia për të dalluar një derë mund ta thjeshtonte ndjeshëm jetën e përditshme, shkruan swissinfo. Gjithashtu, ata që ushtroheshin më shumë me syzet, shihnin më mirë, transmeton albinfo.ch.
Megjithatë, ky hap i rëndësishëm është ende larg fundit të rrugëtimit. “Jemi ende shumë larg momentit kur pacientët do të mund të lexojnë apo të kenë llojin e shikimit me të cilin jemi mësuar,” tha Futterknecht. Tani po punohet për të përmirësuar elemente të ndryshme të terapisë, përfshirë proteinat që i bëjnë qelizat të ndjeshme ndaj dritës.
Përfitimet e mundshme
Në rastin ideal, pacientët e trajtuar duhet të jenë në gjendje të shohin sërish pa syze. Shpresa afatgjatë është “të rikthehet shikimi sa më shumë që të jetë e mundur,” thotë Futterknecht.
Konkretisht, të gjithë pjesëmarrësit në studim vuajnë nga retiniti pigmentoz, por shkaqet e sëmundjes ndryshojnë. Futterknecht thotë se kjo tregon se terapia e re gjenetike ka potencialin t’u sjellë dobi shumë personave të verbër, e jo vetëm një grupi të vogël e specifik.
Terapia optogjenetike nuk trajton çdo shkak të mundshëm të formave të ndryshme të kësaj sëmundjeje, ku në fazat e avancuara qelizat e retinës që reagojnë ndaj dritës mezi funksionojnë. Përkundrazi, ajo u mundëson qelizave të tjera në retinë që të reagojnë ndaj dritës.
