Zvicra po përballet me një rritje të numrit të shoferëve të moshuar, por plakja e popullsisë nuk nënkupton domosdoshmërisht më shumë aksidente rrugore. Ekspertët theksojnë rëndësinë e aftësive individuale, gjendjes shëndetësore dhe përdorimit të teknologjisë.
Në vitin 2024, në Zvicër ishin të regjistruar 517.754 drejtues automjetesh të moshës 75 vjeç e lart, ndërsa numri i personave mbi 65 vjeç me patentë vazhdon të rritet.
Të dhënat zyrtare tregojnë se drejtuesit mbi 65 vjeç shkaktojnë më pak aksidente me të lënduar në shifra absolute sesa grupmoshat më të reja. Megjithatë, në raport me kilometrat e përshkuara, rreziku i përfshirjes në aksidente rritet veçanërisht te drejtuesit mbi 80 vjeç.
Rasti i një gruaje 91-vjeçare, e cila në fillim të tetorit u përplas me automjetin e saj në një kopsht restoranti në Einsiedeln, ku katër persona u dërguan në spital, ka rikthyer debatin mbi sigurinë e drejtuesve të moshuar.
Sipas Sarina Keusch nga Zyra Federale Zvicerane e Rrugëve (ASTRA), mosha në vetvete nuk përcakton aftësinë për të drejtuar. Më të rëndësishme janë aftësitë individuale dhe gjendja shëndetësore e shoferit.
Ekspertët propozojnë përmirësimin dhe unifikimin në nivel kombëtar të procedurave për vlerësimin e aftësisë për drejtim. Një rol të rëndësishëm mund të luajnë edhe sistemet moderne të asistencës dhe teknologjitë e drejtimit të automatizuar.
Profesoresha Isabel Margot-Cattin thekson se teknologjia mund t’u mundësojë disa personave të moshuar të vazhdojnë të lëvizin në mënyrë të sigurt edhe kur aftësitë e tyre fillojnë të dobësohen. Por ajo paralajmëron se këto sisteme duhet të kuptohen dhe të përdoren siç duhet, pasi në disa situata mund ta bëjnë drejtimin më kompleks.
Debati në Zvicër tashmë po zgjerohet përtej pyetjes se deri në çfarë moshe duhet të drejtojnë njerëzit automjetet. Në fokus është edhe mënyra se si teknologjia, transporti alternativ dhe politikat publike mund të sigurojnë lëvizshmëri të sigurt për një popullsi që po plaket.
