Sipas një artikulli të publikuar nga The Local, të përditësuar sot, sezoni i zakonshëm i ngrohjes në Zvicër fillon nga mesi i shtatorit dhe vazhdon deri në mesin e majit. Megjithatë, aktivizimi i ngrohjes nuk varet vetëm nga kalendari, por edhe nga temperaturat e jashtme, transmeton albinfo.ch.
Kur duhet të aktivizohet ngrohja?
Sipas platformës së pasurive të paluajtshme Homegate, sezoni i ngrohjes zakonisht zgjat nga mesi i shtatorit deri në mesin e majit.
Megjithatë, sipas shpjegimit të The Local, kur temperatura e jashtme bie nën 14 gradë Celsius, pronarët duhet të sigurojnë ngrohjen e banesave, edhe nëse kjo ndodh jashtë periudhës së zakonshme.
Nevoja për ngrohje ndryshon edhe sipas rajoneve. Për shembull, në kantonin Ticino temperaturat mund të mbeten relativisht të larta deri në fund të vjeshtës, ndërsa në rajonet më të ftohta të Zvicrës ngrohja mund të jetë e nevojshme shumë më herët.
Çfarë të drejtash kanë qiramarrësit?
Nëse pronari nuk e aktivizon ngrohjen dhe temperatura në banesë është e papërshtatshme, qiramarrësit mund të kërkojnë ndërhyrje.
Sipas Shoqatës Zvicerane të Qiramarrësve (ASLOCA), banorët duhet ta njoftojnë pronarin për problemin përmes një letre të regjistruar.
Në rast se mungesa e ngrohjes vazhdon, qiramarrësit mund të kërkojnë edhe ulje të qirasë për periudhën gjatë së cilës banesa nuk ka pasur ngrohje të përshtatshme. Kjo kërkesë lidhet me momentin kur pronari është njoftuar për problemin.
Sa duhet të jetë temperatura brenda banesës?
Në Zvicër nuk ekziston një temperaturë e vetme e përcaktuar me ligj që duhet të zbatohet në çdo banesë. Megjithatë, qiramarrësit kanë të drejtë të jetojnë në ambiente me ngrohje të përshtatshme.
Udhëzimet për kursimin e energjisë rekomandojnë që temperatura e dhomave të mos kalojë 20 gradë Celsius.
Ekspertët gjithashtu theksojnë se mbajtja e temperaturës në rreth 19 gradë mund të ndihmojë në uljen e konsumit të energjisë dhe të shpenzimeve të ngrohjes me rreth 5 deri në 6 për qind.
Gjatë natës, temperatura mund të ulet për të kursyer energji, ndërsa gjatë ditës duhet të sigurohen kushte të përshtatshme për banim.
Me afrimin e muajve më të ftohtë, njohja e këtyre rregullave dhe rekomandimeve është veçanërisht e rëndësishme për familjet që jetojnë me qira në Zvicër.
