Merz uron Kurtin: Ndërtoni ura përtej ndarjeve partiake dhe zgjidhni çështjet institucionale

Kancelari gjerman e ka uruar Albin Kurtin për rizgjedhjen si kryeministër, duke theksuar nevojën për zgjidhjen e çështjeve të hapura institucionale dhe përparimin e dialogut me Serbinë

Kancelari i Gjermanisë, Friedrich Merz, i ka dërguar letër urimi kryeministrit të Kosovës, Albin Kurti, me rastin e rizgjedhjes së tij në këtë detyrë, transmeton albinfo.ch.

Në letrën e publikuar nga Qeveria Federale e Gjermanisë, Merz ka vlerësuar se pas muajsh pasigurie politike, mandati i ri i Kurtit krijon mundësi për tejkalimin e ndarjeve partiake dhe zgjidhjen e çështjeve institucionale që kanë mbetur të hapura.

“Konfirmimi i zgjedhjes suaj ofron mundësinë për të ndërtuar ura përtej vijave partiake, për të zgjidhur çështjet e mbetura institucionale dhe për të çuar përpara reformat”, ka shkruar Merz.

Në këtë kuadër, kancelari gjerman ka veçuar edhe dialogun Kosovë-Serbi. Sipas tij, mbetet thelbësore që të arrihet përparim i konsiderueshëm në dialogun për normalizimin e marrëdhënieve, i cili udhëhiqet nga Bashkimi Evropian.

Merz ka përsëritur gjithashtu qëndrimin e Gjermanisë për të vazhduar mbështetjen ndaj Kosovës.

“Gjermania qëndron edhe më tej e vendosur në krah të Kosovës. Ne jemi të lidhur me popullin e Kosovës përmes një miqësie të veçantë”, thuhet në letrën e kancelarit gjerman.

Në fund të mesazhit, Merz i ka uruar Kurtit sukses në ushtrimin e mandatit të ri qeverisës./Albinfo.ch

---