Ora dimërore: Ja kur kthehen akrepat një orë prapa

Ndryshimi i orës në vitin 2026 do të bëhet në orët e para të së dielës, 25 tetor, kur akrepat do të kthehen nga ora 03:00 në 02:00

Edhe këtë vit, me ardhjen e vjeshtës, do të rikthehet ora dimërore. Ndryshimi do të bëhet në natën mes të shtunës, 24 tetor, dhe të dielës, 25 tetor 2026, transmeton albinfo.ch.

Në orën 03:00 të mëngjesit, akrepat do të kthehen një orë prapa, në 02:00. Kjo do të bëjë që intervali nga ora 02:00 deri në 03:00 të përsëritet dhe, për pasojë, nata do të zgjasë një orë më shumë.

Për përdoruesit e telefonave inteligjentë, kompjuterëve dhe pajisjeve të tjera të lidhura me internetin, ndryshimi zakonisht kryhet automatikisht. Ndërkaq, orët analoge dhe disa pajisje të tjera duhet të rregullohen manualisht.

Pas kalimit në orën dimërore, ndryshon edhe ritmi i dritës gjatë ditës. Dielli do të lindë më herët sipas orës së re, ndërsa perëndimi do të jetë rreth një orë më herët. Kjo nënkupton më shumë dritë në orët e mëngjesit, por edhe errësirë më të hershme gjatë pasdites.

Për shumicën e njerëzve, përshtatja me orarin e ri bëhet brenda një periudhe të shkurtër. Megjithatë, ndryshimi mund të ndikojë përkohësisht në gjumin dhe rutinën e përditshme, derisa organizmi të përshtatet me orarin e ri.

Pra, në natën mes 24 dhe 25 tetorit, akrepat kthehen një orë prapa dhe fitojmë një orë gjumë./Albinfo.ch

---