REMIX në raftet e Import Parfümerie – një markë e krijuar nga shqiptarët e rinj të Zvicrës

Një parfum i krijuar nga shqiptarët e rinj të Zvicrës ka arritur të depërtojë në një prej rrjeteve të njohura të parfumerisë në vend. Nga 1 tetori, REMIX Parfum është i pranishëm me parfumet e tij në raftet e 24 filialeve të Import Parfümerie.

Është një arritje që shkon përtej suksesit të një marke. REMIX është shembull i një gjenerate të re shqiptarësh të rritur dhe formuar në Zvicër, e cila gjithnjë e më shumë po kalon nga roli i konsumatorit në atë të krijuesit, prodhuesit dhe sipërmarrësit.

 

 

Pas afro dy vitesh pune, investimi, rreziku dhe përkushtimi, REMIX ka arritur një prej sfidave më të vështira për një markë të re: të fitojë hapësirë në raftet e një emri të njohur të tregut zviceran të parfumerisë, përkrah produkteve dhe markave ndërkombëtare.

Por hyrja në raft është vetëm hapi i parë.

Pesë javë vendimtare për REMIX

 

 

Pesë javët e para në Import Parfümerie janë një fazë testuese. Nëse produktet priten mirë nga konsumatorët dhe arrijnë shitjet e nevojshme, krijohet mundësia që REMIX të bëhet pjesë e qëndrueshme e asortimentit dhe më pas të zgjerohet edhe në filiale të tjera.

Pikërisht në këtë fazë edhe komuniteti shqiptar në Zvicër mund të japë një shtysë të rëndësishme.

 

 

Nuk bëhet fjalë për të blerë një parfum vetëm pse është shqiptar. Por nëse produkti na pëlqen, nëse e vlerësojmë cilësinë e tij dhe gjithsesi kërkojmë një parfum për vete apo për dhuratë, atëherë kemi mundësinë që me zgjedhjen tonë të mbështesim njëkohësisht edhe një histori shqiptare të sipërmarrjes në Zvicër.

Sepse çdo markë shqiptare që arrin të hyjë dhe të qëndrojë në tregun e madh zviceran, ia hap pak më shumë derën edhe produktit të ardhshëm, sipërmarrësit të ardhshëm dhe gjeneratës që vjen pas.

Duke faktorizuar produktet tona, faktorizojmë edhe komunitetin tonë.

REMIX e ka bërë hapin e parë dhe ndoshta më të vështirin: ka arritur nga ideja dhe puna e shqiptarëve të rinj të Zvicrës deri në raftet e një prej emrave të njohur të parfumerisë zvicerane. Tani është koha që produkti të provojë veten në treg./Albinfo.ch

 

---