“Made in Switzerland”: Karburant për avionë pa përdorur lëndë fosile

Një teknologji e re zvicerane synon të prodhojë karburant të qëndrueshëm për aviacionin, duke përdorur ujë, energji të rinovueshme dhe CO₂.

Një teknologji e zhvilluar në Zvicër po hap një rrugë të re për prodhimin e karburantit të avionëve pa përdorur naftë apo burime të tjera fosile, transmeton albinfo.ch.

Procesi nis me ujin dhe energjinë elektrike të rinovueshme, të cilat përdoren për prodhimin e hidrogjenit të gjelbër. Më pas, hidrogjeni kombinohet me CO₂ të kapur nga ajri ose nga burime biologjike për të krijuar metanol të gjelbër.

Faza kryesore e teknologjisë është një sistem i ri katalitik i zhvilluar nga kompania me bazë në Cyrih, Metafuels, në bashkëpunim me Institutin Paul Scherrer (PSI). Sistemi e shndërron metanolin në karburant të qëndrueshëm për aviacionin (SAF), një lloj vajguri sintetik që mund të përdoret në avionët dhe infrastrukturën ekzistuese.

Procesi, i quajtur “aerobrew”, është patentuar dhe synon të mundësojë uljen e emetimeve në aviacion pa kërkuar domosdoshmërisht avionë apo motorë të rinj./Albinfo.ch

---